Cinîyêka cîwane ya bi nameyê Sorxwîn Sedun ke sûka Dêrika Vakur û Rojhelatê Sûrîye ra ya, 16 serrîya xo de deyîrbazîye kena. Sorxwîn bi veng û hunerê xo ya ke tarîxê Kurdan û rindîya ruhê aye yo modernîzekerdeyî gêna, yena şinasnayene.
Sorxwîn da zanayene ke a mîrasgêra deyîranê ke vîyarteyê ci ra mendê ya. Sorxwîn eşkera kerd ke a pawitoxê melodîyêka resena kurdkî ya ke hîkaye û hesretan beyan kena. Ewro bi awanbîyayîşê şoreşê Rojawanê Kurdistanî reyde, a bi serekberzî hunerê xo yê kurdkî pêşkêş kena.
‘Ez 12 serrîya xo ra nat deyîrbazîye kena’
Sorxwîn Sedun qala destpêkê musayîşê deyîrbazîye kerd û wina va: “Ez mîyanê keyeyêk (malbatêke) ke hunerî reyde eleqedar o de ameya dinya, her kesê keyeyê mi de deyîrbazîye kerdêne. Wexto ke ez 12 serre bîya, pîyê mi, mi musna deyîrbazîye, her tim mi vengê xo perwerde kerdêne ke ez bimûsa û deyîrbazîye bikera. Çîke deyîrbazî kulturê ma ya, ê pîl û kalikanê ma yo, seba ke ma a deyîrbazîye modern bikerê, ganî ma bimûsî deyîrbazîye bikerî. Helbet wexto ke mi perwerdeyê vengî girewtêne, mi hetê qirika xo ra zehmetî dîyêne. Çîke çîyêko rehet nêno, ganî ti ked bidî heta ke ti serkewtişî qezenc bikerî.”
‘Her kesî vatêne vengê to zaf weş o’
Sorxwîn Sedun dîyar kerd ke aye serrîya xo ya qij de mewalêka deyîrbazî tomar kerda û wina dewam kerd: “Destpêk de pîyê mi zaf paştî da mi ke ez deyîrbazîye bikera. Embazanê dorûverê mi zî paştî dayêne mi. Her kesî vatêne vengê to zaf weş o. Bi vatişanê înan ez bihêz bîyêne û mi mewalî vatêne. Serrîya xo ya qij de ez şîya merkezê Pargînî, mi deyîra xo uca de tomar kerde û uca ra deyîra mi veng da û ez hîna zêde ser kewta.”
‘Hunerê xo vîr ra mekerê, modern bikerê’
Sorxwîn Sedun ard ziwan ke a tewrê konser û şahîyan bîya û armancê xo yê deyîrbazîye wina îzeh kerd: “Wextanê verênan de pîr û kalikê ma koçer bîyê, şîyêne û bi deyîrbazîya xo ameyêne şinasnayene. Seba ke ez a deyîrbazîye modern bikera, mi waşt ez bimûsa. Serrîya qij de kes nêeşkeno deyîrbazîye bikero, aye ra seba ke no rayîr verê domananê qijan de bêro akerdene, mi xo înan rê kerd mîsal. Ez mîyanê kultur û hunerê Dîcle de ya, koma Cûdî de cayê xo gêna. Ez tewrê xeylêk konser, şahî, roşanê cinîyan û yê Newroze bîya. Deyîrbazî seba mi manayê serekberzîye ya. Ez wazena ke wextê xo yo ke yeno de, domananê bimûsnî deyîrbazîye, seba ke nifşo newe kulturê xo şinas bikero û vîndî mekero. Ez her kesî rê vana ke kulturê xo nas bikerê, hunerê xo vîr ra mekerê, modern bikerê.”
