Dayîkê Aştî yê Botanî bale ant hêrişanê Tirkîya yê Başûrê Kurdîstanî ser o û vat ke seba ke aştî biba ganî dewlete hêrişanê xo vindarna û heta ke hêrişî est bî aştî nêbena.
Rixmê xofesihkerdişê PKK’yî hêrişanê vera cayanê Başûrê Kurdîstanî gerîlayan ser o dewam kenê. Merkezê Resnayîşî û Çapemenî (NRÇ) ya HPG’yî 5ê hezîran de eşkera kerd ke qerarê xofesihkerdişê PKK’yî ra pey zî hêrişê Tirkîya bi hewayêko giran herême ser o dewam kenê û encamê hêrişan de 2 gerîlayê PKK’yî cuya xo vîndî kerde. HPG’yî eynê wextî de vengda raya pêroyî ke seba prosesê çareserî aver şêro, vera hêrina wirzo.
Endamê Meclîsê Dayîkanê Aştî yê Botanî gedeyê înan şer de cuya xo vîndî kerda, nêrazîbîyayîşê nîşanê hêrişanê Tirkîya da û dîyar kerd ke seba prosesê çareserî encam bigîro, ganî Tirkîya ewilî hêrişanê xo herême ser o vindarna.
‘Key hêrişê vinderê, o wext ma do behsê aştî bikî’
Dayîkanê Aştî ra Ayşe Hezer îfade kerd ke seba bawerîya înan prosesî ra bêra ganî dewlete zî gamanê şênberan bierza û wina vat: “Ma sey Dayîkê Aştî wazenê proseso ke dest pêkerdo bi aştîyêka bi rûmet û menda encam bigîra. Ganî hêrişê Tirkîya vinderê û ma bi hewayêko hempar pîya biciwîyê. Eke hêrişî nêvinderê, aştî nêbena. No zerarêko pîl dano prosesê aştî. Key hêrişî vinderê, o wext ma do behsê aştî bikî.”
‘Seba ke aştî biba ganî dewlete zî hêrişanê xo vindarna’
Halîme Baykara zî îfade kerd ke sey dayîkê aştî ey vera şer û kiştişî yê û wina qisey kerd: “Ganî dewlete zî goreyê mesajê birêz Abdullah Ocalanî têgêra û gaman bierza. Seba ke no proses aver şêro, ganî destpêkî de girewteyê ma yê sîyasî veradîyê û hêrişî bêrê vindarnayene. Eke hêriş û kiştiş est bî, aştî nêbena.”
‘Ma seba aştî vera hêrişan vindenê’
Kîmet Acar zî dîyar kerd ke aştî bi gameştişê yew hetî nêbena û wina vat: “Ma seba prosesî gelekî keyfweş ê. La aştî bi yew hetî nêbena. Ganî dewlete gaman bierza. Ganî girewteyê nêweş û birêz Abdullah Ocalan veradîyê. Ma vengdanê her kesî ke vera hêrişan vinderê. Wa şar zî wirzo lingan ser o û vera hêrişan vindero. Seba ma hemînan firsendêko baş est o ganî dewlete zî nê firsendî baş bikar bîyara.”
