Almanya de 1993yî ra nata qedexeyê vera PKK’yî yeno domnayene. Bado ke muracatê wedartişê qedexeyî hetê hukmatî ra ame redkerdene avûkatan da zanayene ke înan muracatê mehkemeya îdarî kerd.
Almanya de 1993yî ra nata qedexeyê vera PKK’yî yeno domnayene. Avûkatan 11ê gulana 2022yî de muracatê hukmatê Almanî kerd ke wa qedexeyê vera PKK’yî bêro wedaritene. Hukmatî cewabo negatîf da.
Sereka Heyetê Îdareyî ya MAF-DAD’î avûkat Heike Geisweid moderoatorîya konferansê çapemenîye kerd. Avukat Lukas Theune ke 2022yî de semedê wedaritişê qedexeyî murat kerd, Vervatoxa KNK’yî Nilufere Koç û Die Linke ra Ferhat Koçakt sey qiseykerdoxan tewrê ci bîyî.
Heike Geisweid vist vîrî ke PKK’yî kongreya xo ya gulane de qerarê xo feskerdişî girewt û vat: “Dewleta tirke hema gamêka huqûqî û sîyasîye nêeşte û hêrişanê xo domnena. Almanya zî vera kurdan krîmînalîzasyon û qedexeyê falîyetan domnena ke no verê prosesê haştîye geno.”
Avûkat Lukas Theuneyî zî nê vatî: “PKK’yî bi kongreyêka tarîxîye eşkera kerd ke xo fes kerdo. Seba ke prosesê haştîye ser bikewo gerek Almanya qedexeyî wedaro. PKK’yî dewa akerde û dewa Mehkemeya Îdareyî ya Berlin de dewam kena. Wezîrîya Karanê Teberî vat ê do paştî bidê prosesê ke Abdullah Ocalanî dayo destpêkerdene. Coka hukmatê Berlinî cade paştî bido deklarasyonî.”
Vervatoxa KCK’yî Nilufere Koç vist vîrî ke hukmatê Almanî paştî daye vengdayîşê Rayber Apoyî û vat: “Têna pê qale nêbeno, gerek pratîk de paştî bêro dayene. Erdogan û Bahçelîyî zî pozîtîf nizdî bîyî la nîno famkerdene ke Almanya de qey hema qedexeyê vera PKK’yî est o. Berlin gerek herinda girkerdişê adirî de paştî bido prosesê haştîye.”
