Şanoger Ozcan Ateş îfade kerd ke înan emserr bi sloganî ‘Çiraya me geş dibe’ Festîvalê Tîyatroyî yê Amedî yo 10. organîze kerd û Festîval atmosferêko xeylê weş de bîyo û vat: “Beşdarbîyayîş zî xeylê xurt bi.”
Mabênê tarîxanê 25ê nîsane û 4ê gulane de Çand Amed de bi pêşengîya Şanoyê Bajêr ê Amedî de bi sloganî “Çiraya me geş dibe” ame kerdene. Ewropa ra, Rojhelat û Başûrê Kurdîstanî ra xeylê mêmanê beşdarê festîvalî bîyê.
Festîval Bavê Teyarî rê ame dîyarî kerdene
Derheqê festîvalî de Şanoger Ozcan Ateş çimdarîyê xo ajansê ma reyde pare kerdî. Şanoger Ozcan Ateş îfade kerd ke înan emserr bi sloganî ‘Çiraya me geş dibe’ Festîvalê Tîyatroyî yê Amedî yo 10. organîze kerdo û vat: “Festîval 10 rojan dewam kerd. Ma festîvalê emserrî Bavê Teyarî rê dîyarî kerd. No seba ma keyfweşî û sereberzî ya. 10 komî beşdarê festîvalî bîyê, kayê weşî pêşkêş kerdî. Mîyanê înan de kayêko ermenkî, 4 kayî tirkî est bîyê, yê binî zî bi lehçeyanê Kurdkî bîyê. Festîval atmosferêko xeylê weş de ame kerdene. Beşdarbîyayîş zî xeylê xurt bi. Temaşekerdoxî salon de ca nêgirewt. Goreyê serranê verênan beşdarbîyayîş xeylê xurt bi. Serranê verênan de seba ke şaredarî destê qeyûmî de bîye, ma nêeşkayê xebatanê başan bikerê. La emserr Şaredarîya Amedî ya Şaristanê Girdî bîye wayîrê festîvalî. Reklamê festîvalî baş ame kerdene, nê zî tesîrê xo beşdarbîyayîşê ser o kerd.”
‘Bi saya festîvalan şano xurt beno’
Ozcan Ateş îfade kerd ke seba averşîyayîşê şano û sînemayî, seba vînayîşê karê yewbînan festîval karêko baş o û qiseykerdişê xo wina qedêna: “Bi saya festîvalan hunermendî yenê têhet, şanoyê ser o sohbet, nîqaş û terraqî yenê kerdene. Bi saya festîvalan kêmaneyî û asta kayan vejîyena orte, kayî yenê nîqaşkerdene. Festîval beno wesîleyê hewldana xurtkerdişê şanoyî. Seba ke asta şanoyî hîna baş biba, festîval beno zemînê nîqaşan. Sey Şanoyê Amedî ma hewl danê ke kayanê xo biresnê heme cayan. Taybetî zî kayê seba gedeyan. Çîyo tewr muhîm zî o yo. Reyna ma do xebatanê seba gedeyan hîna pîl û hîra bikerê.”
