Goreyê melumatanê Tora Heqanê Merdiman ê Kurdîstanî aşam adare de 6 welatijê kurdî hepisxaneyanê Rojhelatê Kurdîstan û Îranî de hetê rejîmê Îranî ra ameyê dardekerdene. Aşama adare de 34 welatij û çalakîkerê kurdî zî ameyê destbendkerdene.
Tora Heqanê Merdiman ê Kurdîstanî derheqê dardekerdiş û destbendkerdişê welatijanê kurdanê Rojhelatê Kurdîstan û Îranî de melumatê neweyî pare kerdê. Goreyê malumatanê ke ameyê parekerdene, aşma adare de 6 welatijê kurdî hepisaxaneyê Bokan, Kirmaşan, Kirman, Bender Ebas û Kerecî de ameyê dardekerdene. Hetê Dîwano Berz ê Îranî ra bi manayê çalakîyanê sîyasîyan cezaya dardekerdişî daye 2 heb welatijanê kurdan. Aşma adara emserrî de 34 welatij û çalakîkerê kurdî şaristananê Sînê, Urmîye, Îlam û Kirmanşanî yê Rojhelatê Kurdîstanî de bi sebebanê sîyasî hetê Wezaretê Îtlaetî ra ameyê destbendkerdene. Mîyanê kesanê de ke ameyê destbendkerde, 2 gedeyê ke emrê înan 18î ra şenikêr o, est ê. Înan ra 2 kesî ameyê girewtene û çarenusê destbendkerdeyanê bînan dîyar nîyo.
Ame zaneynene ke aşma adare de 7 welatijê kurdî bi îdiaya ‘vera dewlete kerdişê propaganda û herimnayîşê ewleyîya pêroyî’ hetê Buroyo Yewin ê Mehkemaya Şorişî ya Sînê ra ameyê muhakemekerdene. Erjeno merdim vajo ke aşma sibate ya emserrî de zî 7 welatijê kurdî Rojhelatê Kurdîstan û Îran de ameyê dardekerdene. Reyna 22 welatij û çalakîkerê kurdî zî ameyê destbendkerdene.
