Endama komîteya organîzasyonî Delal Ozbey ya mitîngê 8ê Adare seba mitîngo ke Meydanê Îstasyonî yê Amedî de bibo, her kes dawet kerd û va: “Seba ke aştî biba ma amade yê û ma do her çîyo ke destê ma ra yeno, bikê.”
Şaristananê Kurdîstan û Tirkîya de emserr hazirîyê 8ê Adare Roja Cinîyan a Dinya ke do bi sloganê “Ma vera qirkerdişê cinîyan serewedarenê, ver bi azadîye rayîr ra şonê” do bêro pîrozkerdiş, bêmabên dewam kenê. Amed mitîngê ke do 8ê Adare Meydanê Îstasyonî yê Qezaya Yenîşehîrî de bibo, heme hazirîyî dewam kenê. Zaf cayanê şaristanî de billboard, bayraq û pankartî ke seba dawetkerdişê mitîngî yê, ameyî aliqnayene.
Delal Ozbey, endama komîteya organîzasyonî, bale ant muhîmîya 8ê Adare ya seba cinîyan ser o û va: “8ê Adare hetê tarîxê têkoşînê cinîyan ra rojêka tewr muhîm a. Ma do bi sloganê “Ma vera qirkerdişê cinîyan serewedarenê, ver bi azadîye rayîr ra şonê” mitîng bikê. Mitîngî de aktîvîstê TJA’yî Gultan Kişanak, Ayla Akat Ata, Verfeka Meclîsê Cinîyan a DEM Partî Halîde Turkoglu do qisey bikerê û hunermende Rojda do bêra.”
Ozbey wina dewam kerd: “Ma cinî seba aştî amade yê. Seba ke aştî biba ma amade yê û ma do her çîyo ke destê ma ra yeno, bikê. Ma zanê ke rolê cinîyan prosesê aşitî de çiqas muhîm o. Ma cinîyan pawenê, wa pîya bi govende û tilîlîyan ma reyde 8ê Adare Meydanê Îstasyonî de wayîr vejîyê.”
