Avukata mîyanneteweyî Eva Schonveld da zanayene ke vengdayîşê Rayberê Şarê Kurd Abdullah Ocalanî muhîm o û wina vat: “Hereketê Azadîya Kurd mîyanê aktîvîstanê sîyasî de tesîrêko mîyanneteweyî awan kerdo, ê bîyê çimeyê îlhamî.”
Vengdayîşê “Awankerdişê komela demokratîk” yê Abdullah Ocalanî 27ê sibate de raya pêroyî de ame parekerdene, hema zî veng dano. Vengdayîşo ke Tirkîya û Kurdîstan de hema zî yeno qiseykerdene, sey “îfadeyê îradeyo pîl” yeno erjnayene.
Delegasyona Tecrîdî yê Mîyanneteweyî avûkat Eva Schonveld ke zaf reyan babeta tecrîdî de serdayîşê Tirkîya kerdo, derheqê vengdayîşo tarixî û tecrîdo de ke hema zî dewam keno, qisey kerd.
‘Ma vengdayîş baş dî, no çîyêko zaf baş o’
Eva Schonveld dîyar kerd ke fotografê Abdullah Ocalanî baş bîyo û nê înan keyfweş kerdo û vat: “Serdayîşê min o ewilînî ra pey serrêk bi ke Abdullah Ocalanî ra malûmat nêameyêne girewtene. Rasta zî no merdim tersnayêne. Ez şaş menda.”
Eva Schonveld dîyar kerd ke ganî aştî zerrî ra ba û derheqê vengdayîşeko de ke ame kerdene zî wina vat: “Aştî bi demokrasîya rast eşkena bêra ca. Vengdayîşê Ocalanî muhîm o. Ganî derheqê demokrasî de bêro qiseykerdene. Bêçekbîyayîş ganî bedilîyayîşanê sîyasîyan xo reyde bîyaro.”
‘Tena qiseyî nê ganî pratîk est bo’
Eva Schonveld ard ziwan ke ganî Tirkîya na babete de pratîk bimojna û wina dewam kerd: “Tena qiseyî nê ganî pratîk est bo. Seba ke ma dî ke sozê sîyasî çend qêm kenê. Nê bedilîyayîşê ke yenê kerdene eynî wextî de do seba veradayîşê girewteyanê sîyasî, qedîyayîşê girewtiş, îşkence û destbendkerdişan do bibo fersend.”
‘Vengdayîş îlham û bawerî yo’
Eva Schonveld wina dewam kerd: “Pêameyîşî ra ver ganî zemînêko saxlem bêro awankerdene. No vengdayîş do dînamîkanê herême bibedilnê. Çîyo ke mi dewleta tirke ra fehm kerdo, ganî bi temamî ci ra nêro bawerkerdene. Nê semedî ra zî pêameyîşî ra ver ganî zemînêko saxlem bêro awankerdene. No vengdayîş rasta zî muhîm o. Bi îlham û bawerî yo. Gamêka bicesaret a ke çiray nêameya vînayene.”
‘Hereketê azadîya kurd çimeyê îlhamî yo’
Eva Schonveld ard ziwan ke hereketê azadîya kurd mabênê aktîvîstanê sîyasî de tesîrêko mîyanneteweyî awan kerdo û seranserê dinya de bîyo çimeyê îlhamî.
Eva Schonveld wina erjna: “Bi taybetî xebata Jîneolojî tesîrêko muhîm munaqeşayanê îdeolojîk ê kesan ser o kena ke hewl danê xeylê welatan de bedilîyayîşan bikerê. Zelalbîyayîş, xorînîya fikir û tecrubeyê înan, nêzdîbîyayîşê pragmatîk û kulturê xorîn ê ewnîyayîşê kesanê bînan ra, israrê qedînayîşê kedwerîye ser o û kulturê yewbînan reyde eleqedarbîyayîş û babeta hemverê dinay hesas nêzdîbîyayîş, zelalbîyayîşê înan fikr û tecrubeya înan seba qedînayîşê binpaykerdişî seranserê dinya de beno çimeyê îlhamî.
Eva Schonveld peynîya qiseykerdişê xo e dîyar kerd ke no vengdayîş destpêkê demêko newe yo û wina dewam kerd: “Eke wina bo do zaf baş bibo. Kurdî xeylê waran de pêşeng ê û beno ke na gama ke bi zanebîyayîş la bibaldarî înan bê çek veradana, îlham bida herêmanê bînan. No do bêguman bibo hereketêko bêhempa.”
