Îstanbul – Hepsî Omer Yildirim badê 32 serran hepisxane ra texlîye bî. Omer Yildirimî dîyar kerd ke zaf hepsîyê nêweşî est ê û wina vat: “Ganî seba hepsîyanê nêweşan gamî bêrê eştiş. Seba ke aştî bica bêro, ganî gamî bêrê eştiş. Têkoşînêko 50 serre est o û çimê her kesî azadîya Şarê Kurdî ser o yo. Sey her kesî, Şarê Kurdî zî hewcedarê statûyî yo.”
Hepsî Omer Yildirim serra 1994î de Îstanbul de ame destbendkerdiş, dima ra ame tepiştiş. Mehkemeyê Emnîyetê Dewlete (DGM) cezaya muebetî da Omer Yildirimî. Ganî Omer Yildirim serra 2025î de texlîye bibîyêne la texlîyebîyayîşê ey serrêk ameybi tehîrkerdiş. Omer Yildirim badê 32 serran Hepisxaneyê Kocaelî yê Numre 2 ra texlîye bî.
Verê hepisxaneyî de hetê îdarekaranê Komeleya MATUHAYDER û keyeyê xo ra ame pêşwazîkerdiş. Wexto ke Omer Yildirim hepisxane ra vejîya, qelebalixî sloganê “Bicîwîyo xoverdayîşê zîndanan” eşt.
‘Çimê her kesî azadîya Şarê Kurdî ser o yo’
Omer Yildirim verê hepisxaneyî de qisey kerd. Omer Yildirimî dîyar kerd ke hepisxane de zaf hepsîyê nêweşî est ê û wina vat: “Ganî seba hepsîyanê nêweşan gamî bêrê eştiş. Ez texlîye bîya la hepisxane de zaf embazê ma binê rewşanê çetinan de yê. Heta ke problemê Kurdan çareser nêbç, tu çareserî nêbeno. Coka ganî gamê lazimî bêrê eştiş. Azadîya ma yewbînan ra girêdaye ya. Seba ke aştî bica bêro, ganî gamî bêrê eştiş. Eke ma pîya bê, ma do nê prosesî zî derbaz bikerê. Têkoşînêko 50 serre est o û çimê her kesî azadîya Şarê Kurdî ser o yo. Sey her kesî, Şarê Kurdî zî hewcedarê statûyî yo.”
Badê qiseykerdişî, Omer Yildirim keyeyê xo reyde şi qezaya Kocaelî Gebze.









