Muhîttîn Altino ke 32 serran ra dima zîndan ra ame verdayene, dîyar kerd ke heqê tedawîbîyayîşî yê tepişteyanê nêweşan yeno binpaykerdene û vat: “Seba ke hiqûqêko ke estbîyayîşê nê embazan qebûl bikero çin o, heqê înan yenê binpaykerdene. Ganî nê warî de sererastkerdişêk bibo. Eger sererastkerdişêk nêbo do senî çareserî bibo?”
Muhîttîn Altino ke serra 1993î de Çewlîg de ame destbendkerdene û cezaya miebede dîyaye ci, 11ê nîsana 2025î de Zîndanê Konya ra ame verdayene. Altinî çalakîya bi sernameyê “Ji qanûna çarçoveyî zêdetir aştî, edalet, azadî û civaka demokratîk” a ke Enqere de ameye kerdene de derheqê halê zîndanan û Pêvajoya Aştî û Komelê Demokratîkî de qisey kerd.

Altinî bale ante serê zext û zorîya mîyanê zîndanan û vat ke zîndanî tarîxê kurdan de cayêkê taybet gênê. Altinî dîyar kerd ke wexto ke 32 serran ra dima vejîyayo teber, bajaran de bedilîyayîşêko pîl ameyo meydan: “Bajarî zaf bîyê girsî. Amed hende bîyo girs ke merdim nêşinasneno. Cuya kewta mîyanê telefonan û şar hîna zaf kewto xemê debara xo. Komelkîbîyayîş kêmî bîyo.”
Altinî hema vateyê rewşa xirabe ya tepişteyanê nêweşan da û destnîşan kerd ke mîyanê zîndanî de nêweşîyê hêsanî zî benê giran û kronîk; heta ke nêrê verdayene zî nêeşkenê bêrê dermankerdene. Altinî ard ziwan ke berdayîşê embazan bi behaneyanê cîyayan yeno dergkerdene û dewlet qebûl nêkena ke heqê xo yê tedawîye zî bi dest bifînê.
Peynîya qiseykerdişê xo de Altinî ard vîrî ke serê tepişteyan de tecrîdêko giran esto, heqê hîvîye nêyeno naskerdene û seba heqanê tepişteyan bang kerd ke têkoşîn bêro xurtkerdene û hemparbîyayîş zêde bibo.






