Amed – Endamê Heyetê Îdareyanê Mehelîyan ê DEM Partî Yaşar Karakuşî dîyar kerd ke ê bi awankerdişê daîre û mudirîyanê ziwanî wazenê vera asîmîlasyonî têkoşîn bikerê û her taxe de seba domanan mektebî awan bikerê.
Ziwan tena hacetêkê komunîkasyonî nîyo; mana, nasname û vîrê bingeyên ê komelî yo. Coka xebatê ziwanî yê seviyeya îdareyanê mehelîyan de raste-rast pawitişê nasnameyî û têkoşînê vera asîmîlasyonî reyde têkildar ê. Şaredarîyanê DEM Partî seba pawitiş û averberdişê ziwanê kurdkî Konferansê Îdareyanê Mehelîyan ê aşma hezîrane de qerar dabi ke daîre yan zî mudirîyê ziwanî bêrê awankerdiş. Na çarçewe de yeno waştiş ke şaredarîyanê pîlan de daîre, yê bînan de zî mudirîyê ziwanî bêrê awankerdiş. Sebebê prosesê resmî ra, seba dîyarkerdişê norm kadroyan muracatê wezaretê têkildarî ameyo kerdiş û badê tesdîqkerdişê wezaretan, qerarî do meclîsanê şaredarîyan de bêrê qebulkerdiş.
Eynî wext de xebata tewr muhîme verêmektebê bi ziwanê dayîke, yanî “Zarokistan” ê. Rixmê ke waştişê keyeyan ê seba perwerdeyê kurdkî zaf zêde yo zî, sebebê kêmîya mekteban ra heme domanî nêeşkenê verêmektebanê kurdkî de bêrê bicakerdiş. Nimûne, Amed de hezar û 250 muracatan ra tena 350 domanî ameyê girewtene. Amanco newe no yo ke hûmara zarokistanan bêra zêdekerdiş û no xizmet heme taxan de vila bibo. Endamê Heyetê Îdareyanê Mehelîyan ê Demokratîkan ê DEM Partî Yaşar Karakuşî derheqê qerarê awankerdişê daîre û mudirîyanê ziwanî yê şaredarîyan, astenganê qanûnî, muhimîya xebatanê vera asîmîlasyonî û xizmetê zarokistanan de Ajansa Welatî rê qisey kerd.
‘Ma seba norm kadroyanê ziwanê kurdkî wezaretî rê muracat kerd’
Yaşar Karakuşî vat ke înan bi yewvengîya 400 delegeyan qerarê awankerdişê mudirî û daîreyanê ziwanî dayo û wina qisey kerd: “Badê konferansî ma plansazî û genelgeyê xo amade kerdî û heme şaredarîyan rê şawitî. Raya ewile heme şaredarîyanê ma bi yew vengî seba dîyarkerdişê norm kadroyan wezaretî rê muracat kerd. Wexto ke cewab bêro dayîş û kadroyî bêrê tayînkerdiş, ma do qerarê awankerdişê daîre û mudirîyanê ziwanî meclîsan de bigêrê. Amancê ma yo verên no yo ke ma nê astengê qanûnî wedarnê.”
‘Ziwan nasnameyê komelî yo, ma nêeşkenê xo ci ra dûrî bigêri’
Yaşar Karakuşî dîyar kerd ke şarê kurdî bin êrişêko giran ê qirkerdişê kulturî de yo û ziwan hedefo sereke yê nê êrişî yo û wina dewam kerd: “Ziwan tena parçeyêkê goştî nîyo ke vengan vejeno; ziwan nasname, mana û raştîya komelî yo. Eke amancê îdareyanê mehelîyan xizmetkerdişê komelî bo, ê nêeşkenê xo raştîya ê komelî ra dûrî bigêrê. Eke ma problemê ziwanî ser o nêvindê û çareserkerdişî aver nêberê, ma nêeşkenê vajê ke ma xizmetê nê şarî kenê. No berpirsîyarîyêka tarîxî ya.”
‘Ganî şaredarîyê ma sîstemî nêpawê û hedreyîyanê xo bikerê’
Yaşar Karakuşî dîyar kerd ke nê prosesî de mîsyonêko pîl keweno îdareyanê mehelîyan ser û ganî ê verê ke proses aver şoro hedreyîyanê xo bikerê û wina qal kerd: “Rayberî zî vano ke persa kurdan esasê xo de persa îdareyanê mehelîyan a û ya tewr pîle zî kultur, nasname û ziwan o. Ganî ma mufredat, materyal û kadroyanê xo nika ra amade bikerê ke wexto ke proses aver şî, ma vajê ‘ma amade yê’. Eke ma hedreyîyan nêkerê, vateyê ‘ziwan’ do hewa de bimano. Sewbîna ma na war de rexneya xo danê, çunke hetanî nika ma kêmîyê xo temam nêkerdê.”
‘Amed de seba ziwanê kurdkî 1250 muracatî est ê la 350 domanî ameyê bicakerdiş’
Sewbîna Yaşar Karakuşî bale ante xebatanê vera asîmîlasyonî yê zarokistanan ser û kêmîyanê nê warî bi daneyan wina ardî ziwan: “Komelê ma de tehlukeyêk est a ke asîmîlasyon hêdî-hêdî sey çîyêko tebîî yeno dîyîş. Ma wazenê mîyanê şarî de nê hessasîyetî aver berê. Nimûne, tena Amed de 1250 domanan seba perwerdeyê bi ziwanê dayîke zarokistanan rê muracat kerd la sebebê kêmîya hedreyîyan, butçe û astenganê sîstemî ra, ma tena eşkayî 350 domanan rê ca bidê. Demo newe de ganî ma bê ke sîstemî bipawê, hûmara zarokistanan zêde bikerê û tax bi tax vila bikerê.”
