Îzmîr – Badê teqayîşê Fabrîkaya Asin û Polayî ya HABAŞ’î ya Îzmîrî ke tede 19 karkeran cuya xo vîndî kerdbî, qerarê îdareyî yê qedexekerdişê telefonan bî sebebê reaksîyonanê tujan. Karkerê ke kar verda û kewtê rayîr, mudaxeleyê cendirmeyan reyde rî bi rî mendî û zaf karkerî bi kuyayîş ameyî destbendkerdiş.
Badê teqayîşê Fabrîkaya Asin û Polayî ya HABAŞ’î ya Îzmîrî ke tede 19 karkeran cuya xo vîndî kerdbî, krîzo ke mabênê karkeran û îdareyî de yo resa serê serî. Rixmê ke şîna karkeran û wedaritişê kavilan hema dewam kenê zî, qerarê qedexekerdişê telefonan ê ke hetê Serekê Heyetê Îdareyî Mehmet Ruştu Başaranî ra ame dayîş, bî sebebê reaksîyonan.
Patronî waşt fabrîka de telefonan qedexe bikero
Şewa vîyarte fabrîka de bi eşkerayîyêke ame îlankerdiş ke bi ferman Mehmet Ruştu Başaranî karkerî nêeşkenê bi telefonan bikewê fabrîka û karkerê ke goş nêdanê nê îqazî, do nêeşkê bikewê zere. Karkeran dîyar kerd ke halêkê lezabîn de keyeyê înan nêeşkenê bireşê înan û reaksîyonê xo nê qerarî rê mojnay. Karkeran vat ke Mehmet Ruştu Tirkyakî badê ke ame destbendkerdiş û bi şertê “hepisê keyeyî” azad bî, “hepisê keyeyî” ra ferman dano.
Karkerî nêşîyî kar û îdare protesto kerd
Sebebê qedexeya telefonan û zextanê ke dewam kenê ra, karkeranê vardîyaya şan û sibayî nêxebitîyay. Karkeran verê fabrîka de bi sloganê “Îdare îstîfa”, “Turk Metal îstîfa” û “Ma wazenê bi şeref biciwîyê” çalakî viraşte.
Temsîlkarê sendîkaya Turk Metalî yê ke waştêne karkeran razî bikerê û berê zere, reaksîyonê karkeran reyde rî bi rî mendî. Karkeran bi vateyê “Tîya çend merdimî merdî, her roj şawitiş est o, zûran mekerê”, temsîlkarê sendîka û şefê emnîyetî meydan ra qewetnay.
‘Hetanî cigêrayîşêko serbest nêbêro kerdiş, ma nêxebitîyenê’
Karkerê HABAŞ’î dîyar kenê ke hetanî cigêrayîşê serbestî nêbêrê kerdiş û tedbîrê emnîyetê karî nêbêrê girewtiş, ê do nêxebitîyê. Sewbîna karkeran dîyar kerd ke hetanî waştişê înan qebul nêbê, ê do rayîrê verê fabrîka bigêrê.
Cendirmeyan mudaxele kerd: Karkerî bi kuyayîş ameyî destbendkerdiş
Badê ke karkeran rayîr girewt, cendirmeyî û TOMA şawîyayî meydan. Netîceyê mudaxeleyê eskeran de zaf karkerî bi kuyayîş ameyî destbendkerdiş.
