Amed – Cinîyan dewa Xana Kelê ya qezaya Licê ya Amedî de çarçeweya xebatanê 25ê Teşrîna Peyêne de kombîyayîşêk viraşt. Kombîyayîş de ame vatene ke ganî cinî dewan ra hetanî tax û kuçeyan vera şîdetî xo rêxistin bikerê.
Têgêrayîşê Cinîyanê Azadan (TJA) dewa Xana Kelê ya qezaya Licê ya Amedî de çarçeweya xebatanê 25ê Teşrîna Peyêne, Roja Mîyanneteweyî ya Têkoşînê Vera Şîdetê Cinîyan Ser o de kombîyayîşêk viraşt. Parlamentera DEM Partî ya Amedî Halîde Turkoglu, aktîvîstê TJA’yî, îdarekarê partîyanê sîyasîyan û zaf cinî tewrê kombîyayîşî bîyî. Kombîyayîş Keyeyê Şînî yê dewe de ame viraştene û pankartê “Seba cuyêka azade û bêşîdete vatena ma nêqedîyaya, ma do pîya şîdetî vindarnê” ame dardekerdene.
‘Ganî cinî mîyanê keyeyî de qefelnaye nêmanê, rêxistinbîyayîşê xo xurt bikerê’
Parlamentera DEM Partî ya Amedî Halîde Turkoglu kombîyayîş de bale ante muhimîya rêxistinbîyayîşê cinîyan ê dewe, tax û kuçeyan ser. Halîde Turkoglu dîyar kerd ke ganî zîhnîyeto ke wazeno cinîyan tena mîyanê karê keyeyî de sînordar bikero, bêro şikitene û wina vat: “Ganî ma munaqeşe bikerê ke cinî do senî têkoşînê xo berz bikerê û rêxistinbîyayîşê xo mîyanê dewe, tax û kuçeyan de zêde bikerê. No feraseto ke vano ‘wa cinî tena mîyanê keyeyî de rûnişê û tena karê keyeyî bikerê’ raşt nîyo. Ganî cinî dorûverê xo de wayîr vejîyê, xo rêxistin bikerê û têkoşînê xo gird bikerê.”
Badê qiseykerdişê Halîde Turkoglu, cinîyanê dewe zî bale ante problemanê xo yê rojaneyan ser û waştişê xo ardî ziwan. Înan qerardarîya xo ya seba xurtkerdişê têkoşînê hemparî yê cinîyan zî îfade kerde.
Badê qiseykerdişan kombîyayîş qedîya.
