Abdurrahman Bartinî serrgêra kişîyayîşê lajê xo Îslam Bartinî de ke 12ê teşrîna peyêne ya 2005î de dema protestokerdişê hedîseyanê Şemzînanî yê Geverî de gulevarnayîşê polîsan de amebi kiştiş, dîyar kerd ke dosyayê 17-18 kesan kerdê yew û muracetê ÎHD’yî kerdo ke pêro bêrê zelalkerdiş.
Gever de 12ê teşrîna peyêne ya 2005î de nêrazîbîyayîşê vera hedîseyanê Şemzînanî de ciwan Îslam Bartin amebi kiştiş. Pî Abdurrahman Bartinî da zanayene ke serê hedîseyî ra 21 serrî vîyartî zî kiştoxê nêameyê muhakemekerdene.
‘Şima çira lajê mi kişt?’
Abdurrahman Bartinî da zanayene ke lajê ey dikanê berberî de xebitîyayêne û nêmroje demo ke seba werdî ameyêne keye rastê rayraşîyayîşî ameyo û va: “Lajê mi hema qij bi, şima çira kişt? Bi nêzdîbîyayîşê 8 metreyan to şênayêne lajê mi weş tepişê, la to kişt. Ma bi zehmetî lajê xo kerd pîl.”
‘Dozgerî mi rê va ‘defol’’
Îslam Bartinî dîyar kerd ke wexto ke înan cenaza arda Gever, rastê zextan ameyî û badê hedîseyî dema şîyê dozgerîye dozgerî ra vat: “Eke ti zanê lajê mi 8 metreyan nêzdîyê polîsan ameyo kiştiş, o wext ti kiştoxan zî zanê. Dozger hêrs bi û mi rê vat ‘defol’.”
‘Ez wazena kiştoxî bêrê eşkerakerdiş’
Abdurrahman Bartinî qiseykerdişê xo wina qedêna: “Nika ma dosyayê 17-18 kesan kerdê yew û muracetê ÎHD’yî kerd ke pêro bêrê zelalkerdiş. Ez wazena ke hukmat kiştoxanê lajê mi eşkera bikero. Ma heta peynîye dawayê xo domnenê.”
