Serekê YNK’yî Bafil Talebanî eşkera kerd ke eke ê çîyê ke PDK’yî kerdî welatanê teberî de biqewimîyên, do bîyamêne girewtene, çike heme parlamento rê bêrêzî kerd û heqê şarî binpay kerd. Ey vat: “Parlamento çin o, ma qebûl nêkenê.”
Serekê Yewîya Neteweyîya Kurdîstanî Bafil Celal Talebanî, Foruma Stratejîk ê Silêmanî de derheqê rewşa Herêma Kurdîstanî, çalakkerdişê parlamentoyê Herême ra PDK’yî û rewşa herêmî de qisey kerd.
Bafil Talebanîyî vat: “Çîyo ke parlamento de qewimîya, her çî serûbin kerd û kewt krîzêko gird. PDK’yî temamê parlamentoyî rê bêrêzî kerd û heqê şarî binpay kerd. Pê bawer bê ke nê kerdenî bê ceza nêmaneno, çîyo ke nînan kerd şaşîyêka girde bîye.”
‘PDK çîyêk qebûl nêkeno’
Talebanîyî dîyar kerd ke eke no çî welatanê teberî de biqewimîyêne, do ameyêne girewtene û wina vat: “Çîyo ke parlamento de qewimîya, wêrankerdişêko gird bî. Parlamento çin o û ma qebûl nêkenê. Esasê xo de di îdareyê birêvebirnayîşî estê. Kêmîneyêk PDK’yî de çîyêk qebûl nêkeno. Çîyo ke PDK’yî kerd, welatanê teberî de biqewimîyayêne, do ameyêne zîndankerdene.”
Bafil Talebanîyî qisekerdişê xo de dîyar kerd ke Çemçemal Texasa Kurdîstanî ya û hemû gaz û elektrîkê Herême Kurdîstanî tede yeno berhemdayene, labelê 40 serre yê ke Hewlêrî dima yo. Vat ke seba debareyî êy hewceyê Hikûmetê Herêmê Kurdîstanî nîyê.
Talebanîyî qala projeya Rûnakî zî kerd û vat: “Projeya Rûnakî, ke projeyêka xizmetî bî, bî projeyêka bazirganî seba çend kesan û mehane bi milyonan dolaran qezenc kenê.”
Bafil Talebanîyî dîyar kerd ke şerê Îran û Amerîkayî de înan cehd kerd seba aramkerdişê şarê xo PDK’yî reyde kombîyayîşêk bikerê, labelê PDK’yî amade nêbî. Ey vat: “Sîyasetê PDK’yî Bexda de şaş o, ke gore ey ‘Bexdaya hejar manê Kurdîstaneyêka xurt a’. Labelê no berovajî yo: Bexdayêka xurte yena maneyê Kurdîstanêka xurt a.”
Talebanîyî derheqê hêrişê Kormorî de wina vat: “Hema rew o ke ez biryar bidî kamî hêriş kerd, labelê Îran û komê çekdarî red kerd ke înan hêriş kerdo. Ganî cipersayiş bêro kerdene, ez cipersayişê hikûmetê Zeydî ra bawer a. Eke Bexda sîstemê pawitişî ma rê nêdano, wa rayî bido ma ke ma bi xo bikerê. Ma sîstemê hêrişî nêwazenê, ma sîstemê parastişî wazenê.”
Bafil Talebanîyî eşkera kerd ke o peyamê Tom Barracki de hemfikir o, labelê peyamê înan seba Washîngton û dinya no yo ke ‘wa bêrê verdayene ke pirsgirêkanê xo, xo bi xo çareser bikerê.’
‘Dîplomasî medya de nêbeno’
Bafil Talebanîyî, pey qiseykerdişê xo ra panel de Foruma Stratejîkê Silêmanî rê pêşkêş kerd, derheqê vengdayîşê Serekê PDK’yî Mesûd Barzanî seba têhetamayîşan de qisey kerd û vat ke no peyam ciddî nîyo.
Talebanîyî eşkerayîya xo de dîyar kerd ke nirxnayîş û cipersayîşêko derg ra pey resayî no encam ke no hewldan seba diyalogêko raştikên nîyo. Ey bale ant rayîranê têkîlîyê fermî ser o û wina vat: “Peyamê rûniştişî û dîplomasî ragihandişî de nêyeno kerdene. Numreya telefonê ma yewbînî de est a û mektebê ma yê sîyasî têkîlî de yê. Kam ke fermî waştişê rûniştişî bikero, ma ewnenê ci û bersiv danê.”
Talebanîyî vengdayîşê medya ra zî sey hewldanêka seba viraştişê maneyan nirx kerd û wina vat: “No sey maneyêk o seba eştişê gamanê verarojanê vernîya ma, dima vajê ma waşt labelê êy nêameyî. No kay kayêko kan o û na kula sarê kesî rê nêbena.”
