Îzmîr de polîsan keyeyanê ciwananê sosyalîst û demokratan ser o sereştiş kerd û 23 kesî ameyî destbendkerdene. Îstanbul de zî eynî cipersayîş de Komeleya Hunerî ya Ayisigi Ekin û Weşanxaneyê Yeni Donemî ser o sereştiş ame kerdene.
Îzmîr – Îzmîr de keyeyanê îdarekar û endamanê Têgêrayîşê Kaldiraç, Têgêrayîşê Unîversîteya Azade, Însîyatîfê Têkoşînê Sosyalîst, Têgêrayîşê Ciwanî Serûbin Bike, Partîzan, Ciwanê Demokratîk ê Newe (YDG), Yewîya Têkoşînî, Yewîya Wendekaranê Şorişgêran (DOB), Kolektîfê Wendekaran û Federasyonê Komeleyanê Ciwananê Sosyalîstan (SGDF) ser o sereştiş ame kerdene û 23 kesî ameyî destbendkerdene.
Agahî ameye girewtene ke sereştişê keyeyan çarçewaya di cipersayîşanê cîyayan de ameyî kerdene. Dosyaya verêne de kesê ke îdîa beno roja kiştişê Îbrahîm Kaypakkayayî de beşdarê yadkerdişê ey bîyê, bi îdîaya “propagandaya rêxistine” ameyî destbendkerdene.
Kesê bînî zî bi “endamîya rêxistine” yenê tawanbarkerdene. Çarçewaya dosyaya endamîye de Îstanbul de zî sereştişê keyeyan ameyî kerdene. Agahî ameye girewtene ke endamê Yewîya Têkoşînî û Yewîya Wendekaranê Şorişgêran ê ke Îstanbul de ameyî destbendkerdene, do bêrê berdene Îzmîr.
Kesê ke ameyî destbendkerdene, Emnîyetê Şaristanî yê Îzmîrî de yenê vindarnayene.
Îstanbul
Îstanbul de zî vera Platforma Yewîya Têkoşînî sereştişê keyeyan ameyî kerdene. Çarçewaya cipersayîşî de buroyanê Komeleya Hunerî ya Ayisigi Ekin û Weşanxaneyê Yeni Donemî ser o sereştiş ame kerdene.
Hûmara kesanê ke ameyî destbendkerdene û sebebê destbendkerdişê înan nêame zanayene. Ame dîyarkerdene ke şaristan de endamê Ciwanê Demokratîk ê Newe (YDG), Cinîya Demokratîke ya Newe (YDK), Kolektîfê Wendekaran û Têgêrayîşê Kaldiraçî zî ameyî destbendkerdene.
