Badê ke YNK’yî xo hukmatê demkî yê herême ra vet û tehdîdê di îdareyan vejîya meydan Serekê PDK’yî Mesûd Barzanîyî YNK’yî ra waşt ke PDK’yî reyde ronişo, problemî çareser bikerê û peynîya krîzanê sîyasîyan ê Herême bêro.
Serekê PDK’yî Mesûd Barzanîyî hetanê bînan ê sîyasîyan ra zî waşt ke beşdarê awankerdişê hukmatêkê hîrayî bibê. Barzanîyî bi nameyê Baregeha Barzanî derheqê krîzê sîyasî yê Herêma Federale ya Kurdîstanî de beyanatêk vila kerd û YNK’yî rê waştişêk pêşkêş kerd.
Beyanatî de Barzanî YNK’yî ra wazeno ke PDK’yî reyde ronişo, problemî çareser bikerê û peynîya krîzanê sîyasîyan ê Herêma Federale ya Kurdîstanî bêro.
Sewbîna Barzanî venga hetanê bînan ê sîyasîyan ê Herêma Kurdîstanî zî dano ke beşdarê gamanê seba prosesê sîyasî yê Herêma Kurdîstanî bibê. Barzanî heme hetanê sîyasîyan ra wazeno ke pîya hukmatêko *bingehîra* û neteweyî awan bikerê û waştiş û daxwazanê şarê Kurdîstanî rê cewab bidê.
Di serran ra zêde yo ke weçînayîşê parlamentoyê Herêma Kurdîstanî bîyo la sebebê *menfeetanê* partîyan û parekerdişê postan ra hetanî nika kabîneya newîye ya hukmatê Herêma Kurdîstanî nêameya awankerdene. Rojanê vîyarteyan de PDK’yî bê ke hetanê bînan ê sîyasîyan ra biperso, bi beşdarîya 52 parlamenteran kombîyayîşê parlamentoyî viraşt û heyetê serekîya parlamentoyî weçîna.
Vera naye Konseya Serkerdeyîye ya YNK’yî kom bîye û dima Serekê YNK’yî Bafil Talebanîyî bi vîdeoyêk mesajêk vila kerd û da zanayene ke YNK hukmatê demkî yê Herême ra vejîyena. Talebanîyî da zanayene ke ê kombîyayîşê parlamentoyî nas nêkenê û dîyar kerd ke eke PDK Hewlêr de serekê Herême û serekwezîrî dîyar bikero ê zî do Silêmanîye de eynî postan dîyar bikerê.
