Ciwananê welatperweran ke Yewîya Ciwananê Komunalîstan ê Kurdan (YCK-KURD) îlan kerd, venga tewrbîyayîşê kongreya awankerdişî da ke 13ê kanûne de bi sloganê “Wextê serkewtişîyo” Amed de do bêra kerdiş.
Ciwananê welatperweran Taxa Cûdî ya Cizîrî de Yewîya Ciwananê Komunalîstan ê Kurdan (YCK-KURD) îlan kerd. Înan venga heme ciwananê welatperweran da ke tewrê kongreya awankerdişî bibê ke 13ê kanûne de bi sloganê “Wextê serkewtişîyo” Amed de do bêra kerdiş. Metnê deklarasyonî yo kurdkî Ruzgar Dînçî, yo tirkî zî Tuba Çelike wend.
‘No vengdayîş dîyarîkerdişê cuya tewr raşte ya ciwanan rê yo’
Deklarasyon de bale ame antiş Vengdayîşê Aştîye û Komelê Demokratîkî yê Abdullah Ocalanî ser ke 27ê sibata 2025î de kerdbi. Ame dîyarkerdiş ke vengo ke bi sîstemê tecrîdê Îmrali ameyêne xeneqnayîş, verê her çîyî resa şaranê Tirkîya û Kurdîstanî û heme şaranê dinya. Deklarasyon de ame vatiş ke vengdayîş Belûçîstan ra heta komunanê Amerîkaya Başûrî, Sîcîlya ra heta Fîlîpînan, Abya Yala ra heta Fîlîstînî hetê şaran ra ame silamkerdiş. Ame îfadekerdiş ke muxatabo bingeyên ê vengdayîşî şarê Kurdîstanî û ciwanîya welatperwere ya. Ame vatiş ke vengdayîşî ard vîr ke azadîya şarê kurdî tena cuyêka de beno ke bi hêz û îradeyê xo ameyo awankerdiş û ciwananê kurdan rê “vengdayîş dîyarîkerdişê cuya tewr raşte û bimanaye yo.”
‘Hedefo ke bi ciwanîye yeno girewtiş, ameyoxê ma yo’
Deklarasyon de bale ame antiş Manîfestoyê Komelê Komunalê Demokratîkî yê Abdullah Ocalanî ser. Ame dîyarkerdiş ke manîfesto mojneno tekrarê kehenî bes nêkeno, bê viraştiş xerckerdiş mucadele nêhesibîyeno û bê wedaritişê serdestîya camêrdî nasnameyê azadî nêvirazîyenê. Ame vatiş ke manîfesto no dem sey demê pakbîyayîşê sîstîye, vîrardişê mesulîyetan, persayîş, fikirîyayîş û organîzekerdişî tarîf keno. Deklarasyon de bale ame antiş ke cehd yeno kerdiş ciwanî bi polîtîkayanê şerê taybetî bibê ajan, hişbir û fuhûşî bêrê ramitiş. Ame vatiş ke nê polîtîkayî qirkerdişê kurdan ra cîya nêyenê erjnayîş. Deklarasyon de ame vatiş ke bi ciwanîya ke hafizaya aye yena qedênayîş, wazenê aye xoperest û tena bikerê. Zihnîyeto ke wazeno kurdîtîye biqedno rê “vinde” ame vatiş. Ciwanan îfade kerd ke ê do bibê ciwanê welatperwerî yê komunbîyayeyî û komelkîbîyayeyî.
‘Esasê komunan ser o nasnameyêka pîyayîye ya ciwanîye’
Ame dîyarkerdiş ke ciwanê welatperwerî yê ke Tirkîya û Kurdîstan de mucadele kenê, seba nasnameyêka pîyayîye ya ciwanîye ke esasê komunan ser o organîze bena, bin banê YCK-KURD’î de ameyî têhet. Ame qetîkerdiş ke ciwanîya ke bi polîtîkayanê asîmîlasyon, şerê taybetî û qirkerdişî yena hedefgirewtiş û keyeyan, cayanê karî, kampusan û sînoran de yena hepiskerdiş û parçekerdiş, bi YCK-KURD’î do bireso “ruh û yewîya pratîkî ya komunalîste”. Ame îfadekerdiş ke ciwanî do heme xebatanê xo yê seba azadîya fîzîkî ya Abdullah Ocalanî û serkewtişê Prosesê Aştîye û Komelê Demokratîkî “bi enerjîyêka têmîyanekerdeye” bîyarê têhet.
‘Mîrasê Cizîrî’
Metn de bale ame antiş Cizîr ser zî ke deklarasyon uca ame wendiş. Ame vîrardiş ke Cizîr tarîxê mucadeleyê azadîye de cayanê ke xoverdayîşê estbîyayîşî yê ciwanan pê geş bî ra yew o. Deklarasyon de ame vatiş ke ruhê nê cayan ke ciwanîya komunalîste kuçe bi kuçe tede organîze bîye, vano ke mîrasê ke tarîxî verdo bigêre. Bi nameyê ciwanîye soz ame dayîş ke pêşengîya yewîya komunale her ca de bêra organîzekerdiş.
‘Koka aye mucadeleyê ciwanîye de ya’
Deklarasyon de ame vatiş ke YCK-KURD do bibo pêro û dewamê mucadeleyê ciwanîye ke koka ey xorîn a. Ame îfadekerdiş ke yewî mucadeleyê pêşengê nesilê şorişgêr ê 68î Mahîr Çayan, Denîz Gezmîş, Sînan Cemgîl û Îbrahîm Kaypakkayayî reyde yena têhet ke Abdullah Ocalanî rê bîyo îlham. Deklarasyon de nê çîyî ameyî vatiş: “Yena têhet bi cesaretê qetbîyayîşê Rayber Apoyî ke bi hişyarîya aye kerdbi ke bê azadîya kurdan mucadeleyê şorişgêrî de tu perayîşêko tarîxî nêbeno, bi embazîya Şehîd Hakî Karerî, bi heyecanê Mazlum Doganî yê wexto ke hûmara verêne ya Serxwebûnî vejîyayêne, bi qerardarîya Şehîde Sakîne Cansize ya Zindanê Amedî, bi mesulîyetê Şehîd Hayrî Durmuşî yo ke şarê xo rê hîs kerdêne û bi hêzê organîzebîyayîşê komunalî yê Şehîd Baran Mawayî.”
Deklarasyon de ame vatiş ke YCK-KURD do bibo nameyê keda ciwanîya welatperwere ya ke wazena xeyalê xo bica biyaro: Amara de bi Abdullah Ocalanî reyde sohbetê komunanê felsefeyî de, sûrê Amedî de munaqeşeya komuna tarîxî de, kenaranê Dîcle û Firatî de îmeceyê komunanê ekolojî de, Botan de şîkê şorişê zîraetî yo dîyin de û Serhed de vîrardişê komuna cinîyanê ciwanan a Sema Yuce de pîya bibo. Ame îfadekerdiş ke yewî do bi sîyasetê demokratîkî hacetan û metodanê xo bivîno û bi komunan ke verê her çîyî ziwan, kultur û huner heme waranê cuye de cayî gênê, komelkîbîyayîşê kurdan biresno neteweya demokratîke. Deklarasyon de wina ame vatiş: “Bi wijdanê embazan Hakî û Kemalî do mucadeleyêko enternasyonalî de bi ewnîyayîş û metodêko ciwanî vejîyayîşêkê şorişgêrî xo rê bikero hedef.”
‘13ê kanûne de Amed de: Wextê serkewtişîyo’
Beşê peyênê deklarasyonî de venga heme ciwananê welatperweran ame dayîş ke 13ê kanûne de tewrê kongreya awankerdişî bibê ke Amed de do bêra kerdiş: “Bi YCK-KURD’î royê ke enerjî û xebata ciwanîye tede herikîyenê do biresê yew rayîrê pîyayî û pêro pîya do biherikîyê azadîya Rayber Apoyî û embazîya komunalîste. Na herikîyayîş do şîlîya modernîteya kapîtalîste biqedêno, her cayê ke ra vîyareno de embazîya komunalîste keskîn kena, hêvîyanê tozinan beriqnayena û do bibo mîrazê komelkîbîyayîşî.
Ma bi na hişyarî û mesulîyet venga heme ciwananê welatperweran danê ke 13ê kanûne de tewrê kongreya ma ya awankerdişî bibê ke Amed de do bêra kerdiş. Seba ciwananê welatperweran ê ke do YCK-KURD de bêrê têhet WEXTÊ SEWKETIŞÎ ya. Wextê serkewtişê azadîya fîzîkî ya Rayber Apoyî ya; wextê serkewtişê ganîkerdişê hafizaya ciwanîye ya ke serran o bi hezar û yew ked û mucadele ameya viraştiş; wextê serkewtişê bîyayîşê cinîya ciwane bi hêz û îradeyê xo vera zihnîyetê kiştoxî ya; wextê serkewtişê welatê ke bi hişyarî embazîya komunale ra mûniya ya.”
Eşkerayîye bi sloganê “Bijî berxwedana ciwanan” û “Bijî Serok Apo” qedîya.
