Şaredarîya Seravî seba ekonomîya cinîyan Atolyeya Kilîman akerde. Mamostaya atolyeye Nesîbe Ertaşe bale ante kulturê viraştişê berikan ser û wina va: “Ez wazena ke embazê ma bêrê tewrê atolyeya ma bibê. Şaredarîya ma çiqas ke dest ra yena hetkarîya ma kena û cinîyan rê îmkanan virazena.”
Partîya Seyyewbînîye û Demokrasîya Şaran (DEM Partî) weçînayîşanê 31ê adara 2024î de Wan de heme şaredarî qezenc kerdî û heme şaristan de bîye partîya yewine. Badê ameyîşê hemşaredaranê DEM Partî Wan de xebatê komelkî, kulturî û hunerî dest pêkerdî. Na çarçewa de xerîteyêka rayîrî ameye dîyarkerdiş. Şaredarîya qezaya Seravî zî çarçewaya na xerîteya rayîrî de serra 2024î de qeza de seba cinîyan Atolyeya Kilîman akerde. Cinî uca kilîman virazenê ke hetê ekonomî ra bieşkê hetkarîya keyeyî bikerê.
Mamostaya Atolyeya Kilîman Nesîbe Ertaşe ke domanîya xo ra nat berikan virazena, qalê karê xo kerd û waşt ke no mîras dewam bikero.
Nesîbe Ertaşe destpêkê qiseykerdişê xo de ard ziwan ke badê serra 2010î şîya atolyeya Şaredarîya Wanî ya Şaristanê Girdî. La badê akerdişê na atolyeye ameya Serav. Aye wina va: “Di serrî yo ke ez na atolye de xebitîyena û mamostayîye kena. Verê cû tena xalîçeyî virazîyayêne la nika kilîmî zî virazîyenê. Nêzdîyê 20 cinîyî na atolye de xebitîyenê. Cinîyê ke yenê tîya, hetanî nika qet çîyê winasî nêviraştbî. Goreyê naye cehdê înan est o û rind musenê. Karê ma nika rind şono.”
‘Ma derdê xo ci rê vanê’
Nesîbe Ertaşe dewamê qiseykerdişê xo de dîyar kerd ke viraştişê kilîmêka qije ya yew metre yan zî metre û nêmeyî goreyê lezîya destê kesî aşmêk yan zî di aşmî gêno. Nesîbe Ertaşe îfade kerd ke kilîmê pîlî yê di-hîrê metreyan zî mabênê di û hîrê aşman de virazîyenê. Aye wina dewam kerd: “Wexto ke merdim vîneno, vano ke çiqas zehmet o, ez do nexşê aye senî virazî. La wexto ke merdim dest pêkeno, her çî hîna rehet beno. Ma derdê xo zî kilîman rê vanê, ma pê qisey kenê. Zerreyê ma de çi bibo, ma kilîme ser o nexş kenê. Peynî de na berike bena sey embazêka ma.”
‘Ma wazenê destê cinîyan bigîrê’
Nesîbe Ertaşe hem zî dîyar kerd ke waştişê înan no yo ke na mîrasê kulturê kehenî seba ke vînd nêbo, dewam bikero. Aye qiseykerdişê xo wina qedêna: “Ez wazena ke embazê ma bêrê tewrê atolyeya ma bibê. Şaredarîya ma çiqas ke dest ra yena hetkarîya ma kena û cinîyan rê îmkanan virazena. Tayê cinî est ê ke hema bin destê camêrdanê keyeyî de yê û ma zî cehd kenê ke destê înan bigîrê. Ma wazenê ke ê zî karê destê xo bivînê û wa embazê ma yê cinî keye de nêmanê.”
