Îzmîr de bi pêşengîya TJA û bi şîarê “Bi hêz û îradeyê xo yo azad nika wextê cinîyan o” cinîyî ameyî têhet, vengdayîşê têkoşînê vera qirkerdişê cinîyan kerd.”
Cinîyan Îzmîr de çarçewaya 25ê Teşrîna Peyêne Roja Têkoşînê Mîyanneteweyî yê Vera Şîdetê Vera Cinîyan de çalakî û xebatanê ke do bêrê organîzekerdene daye destpêkerdene. Têgêrayîşê Cinîyanê Azadan (TJA) bi beşdarîya sîyasetmedare Gultane Kişanak û zaf cinîyan Karşiyaka de rayîrşîyayîş organîze kerd. Rayîrşîyayîşo ke bi sloganê “Bi qewet û îradeyê xo yo azad nika wextê cinîyan o” dekewtişê çarşîya Karşiyaka de dest pêkerd, bi eşkerayîya çapemenîye ya verê ÎZBANa Karşiyaka dewam kerd. Eşkerayîye de sloganê “Jin Jiyan Azadî” û “Bijî berxwedana jinan” ameyî eştene. Eşkerayîya tirkî Nîlaye Guleser, ya kurdkî zî Emîne Bozdag wende.
Nîlaye Guleser vat ke ê do vera polîtîkayanê şîdet û qirkerdişî yê sîstemê camêrdserdestî bi nefret û xoverdayîşê xo meydanan de bibê û bale anta kiştişanê cinîyan ê hewteyanê peyênan ê Îzmîrî ser o: Ebru Serep ke Seferîhîsar de keyeyê aye hetê embazê aye yê verênî ra ame veşnayene, Pinar Guneş ke Çeşme de hêrişêkê çekdarî de ameye kiştene û avûkate Ozge Penbegul ke Menemen de hetê nîşankerdeyê xo yê polîsî ra ameye kiştene. Gulesere Mihrîban Yilmaz û Denîz Poyraz zî ardî vîrî û bale anta ser o ke aqubetê Gulîstan Doku nêameyo eşkerakerdene, merdişê Rojîn Kabaîş şikbar o û prosesê merdişê Îpek Er de bêcezayî vejîyaya meydan. Gulesere vat: “Ma zîhnîyetê dadgerîya camêrdserdeste qebul nêkenê ke cuya cinîyan nêpawena, faîlan pak kena û vernîya gêrayîşê edaletî gêna. Ma kiştişê cinîyan sey serebûdanê ferdîyan ney, sey netîceyê qirkerdişê sîstematîk ê cinîyan vînenê.” Gulesere ard ziwan ke Kurdîstan de bi polîtîkayanê şerê taybetî gede û cinîyê ciwanî qîymetanê xo yê komelkîyan ra yenê birnayene, polîtîkayê xeripnayîşî yê bi rayîrê madeyê hişbir, fuhûş, medyaya dîjîtale û kulturê xerckerdişî cinîyan û cuya komelkî hedef gênê, talankerdişê xoza û astengkerdişê ziwanê dayîke zî parçeyê eynî polîtîkayan ê û vat: “Ma do ziwan, kultur, xoza û waranê cuya xo bipawê.”
Sîyasetmedare Gultane Kişanak badê eşkerayîye qisey kerd û ard vîrî ke badê xoverdayîşê Jîna Emînî sloganê “Jin, Jiyan, Azadî” çar hetanê dinya de veng da. Kişanake vat ke cinîyê kurdî û têgêrayîşê cinîyan ê Tirkîya seba vindarnayîşê şîdetê vera cinîyan têkoşînêko pêt ramenê û ard ziwan: “Ma do şîdetê camêrdan bivindarnê. Ez tîya ra, Îzmîr ra venga heme cinîyan dana. Senî ke no zîhnîyeto camêrdserdest seba kiştişê ma cîyayî nêkeno, ma cinî zî ganî bê cîyayî şane bi şane têkoşîn bidê û şîdetê camêrdan, şîdetê dewlete û bêedaletîya ke şîdetê camêrdan pawena, bivindarnê. Têkoşînê azadîya cinîyan, haştî, azadîya şaran, seypêyî û ziwanê dayîke yewbînan ra cîya nêyenê fikirîyayene. Kotî neseypêyî û neheqî est a ma cinî ganî uca vera ci têhet bivinderê û têkoşînê xo yo rêxistinkerde gird bikerê. Şer şîdetî meşrû keno, coka ganî heme cinîyê Tirkîya haştî bipawê. Ganî ma pêro pîya azadîya cinîyan, şaranê xo û ziwananê xo qezenc bikerê.”
