Qeyûmê Şaredarîya Wanî ya Şaristanê Girdî taxanê Kalecîk û Şemsîbeyî de planê îmarî yê demê Bekir Kayayî betal kerd û planêko newe kerd merîyet. Şarê taxan vat: “Ma nê zulmî qebul nêkenê, ganî reyna agêrê îmarê serra 2013î.”
Demê Hemşaredarê verên ê Şaredarîya Wanî ya Şaristanê Girdî Bekir Kayayî de taxanê Kalecîk û Şemsîbeyî de planê îmar û binawanî amebî viraştene û şarî zî goreyê nê planî keyeyê xo viraştbî. La badê tayînkerdişê qeyûmî no plan ame bedilnayene. Planê neweyî de ke bê agahdarîya şarî ameyo xêzkerdene, cayê erdanê vengan de rayîr û projeyî rasterast keyeyanê şarî ser o ameyî ronayene. Qerar 24ê nîsane 2026î de hetê Serkomarîye ra ame weşanayene û kewt merîyet. Şarê taxan venga parlamenter û berpirsîyaran dano ke peynîya na mexdûrîye bêro.
‘Ma îmarê serra 2013î wazenê’
Fadil Kaçakî ard vîrî ke serra 2013î de planê îmarî amebî taxan û şarê taxan reyna îmarê 2013î wazeno û vat: “Seba rayîran erdê vengî nêameyî xebitnayene, rayîr keyeyanê şarî ser ra vîyareno. Wazenê seba naye 5 hezar keyeyan birijnê. Wayîrê nê keyeyan 20 serrî xebitîyayî û nê keyeyî viraştî. Badê rijnayîşî no milet do şêro kotî? Ma wazenê şêrê walî reyde qisey bikerê la destûr nêdanê ma. Ma şinê şaredarî zî problemê ma çareser nêbeno. Emrê mi bîyo 60, ez çewres serrî Îstanbul de menda û perîşan bîya heta ke mi no keye viraşt. Îmaro verên tena %20ê erdê ma gêno la îmaro newe %100ê erdê ma gêno. Ma vera îmarî nîyê. Parlamenteran va ma do piştî bidê şima la înan zî ma caverdayî. Wa berpirsîyarî bêrê, şarî reyde qisey bikerê û wina planan amade bikerê.”
‘Ma parlamenter û berpirsîyaran ra piştîdayîş pawenê’
Mahsûn Şahînî da zanayene ke no problem demê Bekir Kayayî ra nat dewam keno û vat: “Îmaro ke bi destê qeyûmî ameyo viraştene, zaf kesî kerdî mexdûr. Texmînî 4-5 hezar keyeyî do bêrê rijnayene. Mexdûrê îmarî zaf reyî kom bîyî la kesî ma reyde têkilî nêronaye. Ma parlamenter û îdarekaranê xo ra pawenê ke piştîya ma de bivinderê û vengê ma biresnê parlamentoyî. Şarê taxa ma zafane feqîr o, înşaatan de xebitîyeno û bi serran seba nê keyeyan xebitîyayo. Bi sebebê tersê rijnayîşî zaf kesan keyeyê xo nîmcet verdayî. Vengdayîşê ma bitaybetî seba parlamenteranê Wanî yo, wa bibê vengê şarê xo.”
‘Ma vanê wa her çî goreyê edaletî bibo’
Erhan Artanî vat ke ê bi serran o ke Şemsîbeyî de ciwîyenê û demê Bekir Kayayî ra heta ewro bi problemê îmarî reyde rî bi rî yê û ard ziwan: “Her kes ke beno îdarekar goreyê rant û menfeetanê xo îmaran plan keno, kes fikrê şarê taxe nêperseno. Ma zî wazenê îmarê ma bibo, rayîr û parkî bêrê viraştene la ma vanê wa her çî bi rayîrêko edaletwaz bêro kerdene. Wexto ke mi waşt keye virazî ez şîya Şaredarîya Tûşba, înan va ma ruxset nêdanê; evraqê mi pêro rast bîyî zî. Va keyeyê xo viraze, wexto ke ma venga to da bê ruxseta xo bivete. Ewro reyna projeyê neweyî ardî verê ma û ma kerdî mexdûr. Ma îmarêko seypê û merdimane wazenê. Plano nikayên kêrê dewlemendan yeno la feqîran perîşan keno.”
‘Seba rayîrî keyeyanê ma merijnê’
Zîynete Barkine da zanayene ke înan keyeyê xo bi feqîrîye viraştî û nika mexdûr ê û vat: “Emrê ma tîya de vîyart, ma gedeyê xo tîya de kerdî pîl. Nika ma ra vanê keyeyê xo bigîrê û şêrê. Wa ma ra fek veradê û zulm ma nêkerê. Seba rayîrî ca nêmendo? Cayê vengî zaf ê, wa keyeyanê ma merijnê.”
‘Yenê vanê ma do keyeyanê şima birijnê’
Sebîha Yildize zî ard ziwan ke ê nêwazenê keyeyê înan bêrê rijnayene û vat: “40 serrî ma seba viraştişê keyeyê xo xebitîyayî. Mêrdeyê mi xebatkar o, şino teberê şaristanî xebitîyeno. Ma eşkenê seba rayîrî erdê xo ra tayê fedakarî bikerê la heqê şima çin o ke şima keyeyanê ma birijnê. Ma pêro dewan ra koç kerdo û ameyî tîya. Ma zaf reyî şîyî dezgehanê berpirsîyaran la înan ardim nêda ma. Kes nêyeno persa ma nêkeno, yenê vanê ma do keyeyanê şima birijnê.”
