Endamanê EGE TUHAYDER’î verê Edlîyeya Milasî de çalakîya roniştişî viraşt. Înan dîyar kerd ke binpaykerdişê heqan ê hepisxaneyan do zerar bido prosesî.
Komeleya EGE TUHAYDER’î bi sloganê “Pawitişê cuye û awankerdişê aştîye” verê Edlîyeya Milasî ya Mugla de eşkerayîye da û çalakîya roniştişî viraşt. Çalakîye de pankartê “Heqê veradayîşî taloq nêbeno, wa taloqkerdişê înfazan biqedîyê” ame akerdiş. Zaf reyan sloganê “Mîmarê aştîye Îmrali yo” û “Biciwîyo xoverdayîşê hepisxaneyan” ameyî eştiş. Eşkerayîye bi nameyê girseyî Hemsereka EGE TUHAYDER’î Ayfer Yildirime wende.
Ayfer Yildirime dîyar kerd ke Prosesê Aştîye û Komelê Demokratîkî girewteyanê sîyasîyan û keyeyan rê hêvî dayo la mexdûrîyetê ke binpaykerdişanê heqan ê hepisxaneyan ra virazîyenê, dewam kenê. Aye wina va: “Bi vengdayîşê Rayberê Şarê Kurdî birêz Abdullah Ocalanî demêko newe yê bêpêrodayîşî dest pêkerdo. Hêvîyê aştîye her roje hîna pîl benê. Dayîk û keyeyî tam prosesêkê winasî de bi hêvî û bawerî pawenê ke berê hepisxaneyan abê. No proses hetê girewteyanê sîyasîyan ê hepisxaneyan ra zî heyecan û hêvîyêka pîle viraşta. Waştişê girewteyanê sîyasîyan no yo ke biresê azadîya xo, lezabez tewrê cuya komelkîye ya demokratîke bibê û şertanê azadan de piştî bidê nê prosesî. La her çiqas hetê keyeyan û girewteyanê sîyasîyan ra rewşe wina ya zî tabloyo ke vera rewşa hepisxaneyan û binpaykerdişanê heqan ê ke bi îsrar dewam kenê vejîyeno werte, qet weş nîyo. Bitaybetî mexdûrîyetê girewteyanê sîyasîyan dewam kenê ke her çiqas cezayê înan qedîyayo zî veradayîşê înan taloq beno û înfazê înan yeno veşnayîş.”
‘Ganî gamê şênberî ke rayîrê aştîye akenê, lezabez bêrê eştiş’
Ayfer Yildirime îfade kerd ke polîtîkayê şerê taybetî tena bi metodanê eskerîyan ney, her warê cuye de bi hawayêk yenê caardiş ke îradeya sîyasî bişikênê. Aye wina va: “Ma tîya ra verê her çîyî Serekkomarî, Wezaretê Edaletî, sazgeh û mesulanê dewlete yê eleqedaran rê vengdayîşêko eşkera kenê: Prosesê Aştîye û Komelê Demokratîkî ke ma tede yê, heme şaran û her beşê komelî de hêvî, bawerî û qerardarîye gird keno. Seba ke nê waştişî bibê raştî, ganî bêhuqûqî ke verê her çîyî problemanê xorînan ê welatî ra yew a, biqedîyo. Ganî azadîya heme girewteyanê hepisxaneyan bêra temînkerdiş, caardişê ke sîya fînênê prosesî bêrê wedaritiş û gamê şênberî ke rayîrê aştîye akenê, lezabez bêrê eştiş.”
