Hemverfeka DEM Partî Ayşegul Dogane ard ziwan ke ê Prosesê Aştîye û Komelê Demokratîkî de averşîyayîşanê neweyan pawenê. Aye wina va: “Ganî şertê xebata azade ya birêz Ocalanî bêrê ca. Hetanî nika na babete de tu averşîyayîşê neweyî çin ê. La ma pawenê ke demoko kilm de na babete de zî averşîyayîşêko newe bibo. Komel zî paweno.”
Hemverfeka DEM Partî Ayşegul Dogane Merkezê Pêroyî yê partî de derheqê averşîyayîşanê rojeve de eşkerayîyêk daye. Ayşegul Dogane îfade kerd ke ê serrgêra darbeya 4ê teşrîna peyêna 2016î ya vera HDP’yî de yê. Aye wina va: “Hemserek û embazê ma vizêr hepisxaneyanê Edîrne, Kandira û Sîncanî de bîyî. Ewro zî embazê ma verê Wezaretê Edaletî de bîyî. Hetêkê ma verê hepisxaneyan de yo, hetêkê ma zî seba Prosesê Aştîye û Komelê Demokratîkî gamanê şênberan paweno. 4ê teşrîna peyêne destpêkê hedefgirewtişê îradeya sîyasîye bî. Coka ma aye sey darbeyêka vera sîyasetî vînenê. Na darbe tena tasfîyekerdişê qezencanê sîyasîyan ê şarê kurdî nêbî. Eynî wextî de vera demokrasî yê Tirkîya zî bîye. Birêz Fîgen Yuksekdage, Selahattîn Demîrtaş û embazê ma yê sîyasetmedarî bi dawaya kumpasî ya Kobanî 10 serrî yo ke hepisxane de yenê tepiştiş. Ganî embazê ma lezabez bêrê veradayîş. Şima qeraranê Dadgeha Heqanê Merdiman a Ewropa ca nêard. Ma fehm kerd. La şima çira nê dosyayan îstînaf de verdanê? Ma reyna venga şima danê: Ganî embazê ma yew deqîqe zî zere de nêmanê û sîyasetmedar, nuştox û rojnamegerî bêrê veradayîş. Hetanî ke na bêhuqûqî nêro wedaritiş, demokrasî nêvirazîyena.”
‘Hetê qelsî yê prosesî bi huqûq û demokrasî eşkenê xurt bibê’
Ayşegul Dogane dewamê qiseykerdişê xo de qetî kerd ke fikarê şarî seba Prosesê Aştîye û Komelê Demokratîkî est ê. Aye qiseykerdişê xo wina dewam kerd: “Rojanê peyênan de zaf persî est ê: Proses vindertiş de yo yan ney, problem û krîzî est ê yan ney? Ma sey DEM Partî roja verêne ra seba nê hetanê nêeşkerayan ê prosesî pêşnîyazî û îqazî kerdî. Nika ma merheleyêka krîtîke de yê. Badê qanûnê çarçeweyî ma averşîyayîşanê neweyan pawenê. Hem bûrokrasîya dewlete hem zî sîyaset mesulîyetê înan est bî. Ma zî mesulîyetê înan anê vîrê înan. Hetê qelsî yê prosesî bi huqûq û demokrasî eşkenê xurt bibê. Herçiqas kêmasî û nêbesîyê ey bîyî zî qanûnê çarçeweyî muhîm bî. Ganî ma goreyê naye hereket bikerê ke ma do senî piştî bidê prosesî. Ganî vateyê ezberkerdeyî bêrê veradayîş û ziwanêko newe bêro xebitnayîş. Ma rexneyanê xo seba averberdişê prosesî kenê. Ma zî heme rexneyanê pozitîf û ê seba averberdişî rê hedre û akerde yê. Prosesanê çareserkerdişî de wext çîyêko cuyî yo. Coka ganî wext vînd nêbo. Seba ke dejê neweyî nêvirazîyê, ma mecbur ê ke na meseleye pîya çareser bikerê. Aştîyêka daîmîye mesulîyetê ma pêrune ya.”
‘Ma averşîyayîşanê neweyan pawenê’
Ayşegul Dogane da zanayîş ke ê averşîyayîşanê neweyan pawenê û wina dewam kerd: “Ganî heyetê ke ameyê awankerdiş dest bi xebatan bikerê. Ganî komîsyonê Meclîsî bêrê awankerdiş û prosesî de gamê lazimî bêrê eştiş. Ganî komîsyonê Meclîsî xebatan dest pêbikero û eke lazim bo, bieşko qanûnan virazo. Ganî şertê xebata azade ya birêz Ocalanî bêrê ca. Hetanî nika na babete de tu averşîyayîşo newe çin o. La ma pawenê ke rojanê ke yenê de na babete de zî averşîyayîşêko newe bibo. Komel zî pawena. Ganî caardişê qayûman biqedîyê û ê ke ameyê weçînayîş agêrê karê xo. Ganî qerarê Dadgeha Heqanê Merdiman a Ewropa bêrê ca û no raporê komîsyonê Meclîsî de zî est bî. Ganî girewteyê nêweşî lezabez bêrê veradayîş. Ganî astengê verê heqê îfadeyê xo û ramanan bêrê wedaritiş û her kes bieşko fikr û ramanê xo biyaro ziwan. No tena wexto ke caardişê vera demokrasî biqedîyê, mumkin o.”
‘Ganî şertê xebata azade ya birêz Ocalanî bêrê ca’
Ayşegul Dogane bale ante munaqeşeyanê derheqê cayê newe yê Rayberê Şarê Kurdî Abdullah Ocalanî ser û wina va: “Ma pawenê ke rojanê ke yenê de êdî hedrebîyayîşê peyênî yê Heyetê Aştîye û Sîyasetî ke birêz Ocalan tede ca gêno, biqedîyê. Ganî êdî no heyet bi hawayêko aktîf xebatan dest pêbikero. Badê xebatanê heyetî zî ganî heme hetî mesulîyetanê xo bica biyarê. Ma şîyayîşê birêz Ocalanî yê cayê newe yê hepisxane erênî vînenê la no bes nêkeno. Ganî şertê xebata azade ya birêz Ocalanî bêrê ca. Ganî rojanê ke yenê de rojnamegerî û heme beşê komelî bieşkê birêz Ocalanî reyde pêvînayîş bikerê. Xora qanûnê çarçeweyî na firsende dano. Ganî êdî no çî erey nêvisîyo. Ganî firsendê pêvînayîşanê raşteraştan ê bi birêz Ocalanî bêrê ca.”
‘Çalakîya Dayîkanê Aştîye’
Ayşegul Dogane derheqê çalakîya Dayîkanê Aştîye ya Ankara de zî ard ziwan ke Dayîkê Aştîye wazenê gamê şênberî bêrê eştiş. Aye qiseykerdişê xo wina qedêna: “Na nobeta dayîkan a verêne nêbîye, la ê wazenê ke bibo nobeta peyêne û êdî aştîye bêra ca. Ma dayîkan reyde partîyê sîyasî, Wezaretê Edaletî û Serekê Meclîsî ziyaret kerdî. Dayîkî wazenê ke êdî tu dayîk nêbermo û aştîye bêra ca. Dayîkî venga dayîkanê leşker û polîsan danê ke ê zî dest bidê destê dayîkan û pîya aştîye biwazê. Ganî ma vengê dayîkan bihesnê. Partîyanê sîyasî, Wezîrê Edaletî û Serekê Meclîsî bi erênî dayîkî pêşwazî kerdî û waştişê înan not kerdî.”
