Ankara – Serekwekîlê Grûba DEM Partî Sezaî Temellî verê Wezaretê Edaletî de dîyar kerd ke caardişê darbeyî yê vera sîyasetî neticeyê tecrîdê 27 serran o ke vera Rayberê Şarê Kurdî Abdullah Ocalanî yeno kerdiş. Sezaî Temellî wina va: “Ma zî tîya venga şima danê. Rayîrê aştîye Îmrali ra vîyareno. Berê Îmrali akerê.”
Grûba DEM Partî ya Meclîsî û Rayberîya DEM Partî bi munasebetê serrgêra darbeya 5ê teşrîna peyêna 2016î ya vera Partîya Demokratîke ya Şaran (HDP) verê Wezaretê Edaletî de eşkerayîyêk dayî. Eşkerayîye de pankartê “Seba girewteyanê sîyasîyan azadî” ame girewtiş. Serekwekîlê Grûba DEM Partî Gulistan Kiliç Koçyîgîte û Sezaî Temellî û parlamenterê DEM Partî tewrê eşkerayîye bîyî.
Sezaî Temellî ard ziwan ke mudaxeleya edlîye ya vera sîyasetî dewam kena. Ey wina va: “Darbeya 5ê teşrîna peyêne mudaxeleya tewr pîle ya vera sîyasetî bîye. 15 embazê ma yê parlamenterî ameyî girewtiş. Hemserekê ma Fîgen Yuksekdage û Selahattîn Demîrtaş zî mîyanê înan de bîyî. Ganî êdî edlîye mudaxeleya vera sîyasetî biqedêno. Embazê ma bi hawayêko vera huqûqî yenê tepiştiş. Dadgehî huqûqî nas nêkenê. Dadgeh qerarê Dadgeha Heqanê Merdiman a Ewropa nas nêkena. No yeno a mana ke dewleta huqûqî sey çinî yena hesabkerdiş. Ma nêwazenê welatêk de bicuyê ke tede sîyasetmedarî girewte yê. Ma verê Wezaretê Edaletî de venga şima danê ke no caardiş biqedênê. Na dawa dawayêka sîyasîye ya û huqûqî reyde tu eleqeya aye çin a.”
‘Berê Îmrali akerê’
Sezaî Temellî qiseykerdişê xo de bale ante Prosesê Aştîye û Komelê Demokratîkî ser û wina va: “Tirkîya bi tecrîdê 27 serran ê vera birêz Ocalanî ameye na rewşe. La nika ma prosesêk ra vîyarenê. Dayîkê Aştîye zî bi waştişê aştîye ameyî tîya û mesajêko muhîm da. Ma zî wazenê ke êdî caardişê darbeyî biqedîyê û astengê verê aştîye bêrê wedaritiş. Dayîkanê Aştîye ziyaretê Wezaretê Edaletî de waştişê ziyaretê Îmrali kerd. Ma zî kerd. Birêz Ocalan muzakerekarê esasî yê nê prosesî yo. Ma tîya venga Wezaretê Edaletî danê ke nê dosyayan bikero felîyet. Ma zî tîya vanê: rayîrê aştîye Îmrali ra vîyareno. Berê Îmrali akerê.”
‘Waştişê aştîye pîl o la bawerî çin a’
Gulistan Kiliç Koçyîgîte zî da zanayîş ke bi vengdayîşê Aştîye û Komelê Demokratîkî yê Rayberê Şarê Kurdî Abdullah Ocalanî prosesêk dest pêkerdo. Aye wina erjna: “Ma her ca de qalê muhîmîya prosesî kenê. La şar ma ra pers keno. Vanê: hetanî ke sîyasetmedarî girewte bê, aştîye do senî bibo? Eke caardişê qayûman bibê, do senî bibo? Hetanî ke destê dadgehî sîyaset ser ra nêro weriştiş, do senî bibo? Ma zî tîya na pers îqtîdar û wezaretê aye ra kenê. Hema zî girewteyê nêweşî nêyenê veradayîş. Ma naye senî bierjnê? Kesê ke suîstîmalê fonan kerdo û pereyê şarî dizneno, rastê tu çîyî nêyenê. La sîyasetmedarî seba fikr û ramanê xo yenê girewtiş. Seba ke proses komelkî bibo û bawerî virazîyo, eşkenê destê xo bikerê bin kemerî. Waştişê aştîye pîl o. La bawerî çin a. Şar pers keno: Ma do senî caardişanê AKP’yî ra bawer bikerê? Aye sîstemêko faşîst awan kerd û her kes girewt, hepisxaneyî pir kerdî û vera ekonomî, sîyaset û heme waran darbe kerde. Ma do vera heme bêhuqûqîyan vinderê. Ma do pawitişê aştî û demokrasî dewam bikerê. Dayîkê Aştîye ameyî tîya û vat ke gaman bierzê. Pêvînayîşî zî kerdî. Êdî vateyî ney, hewcedarîya gamanê şênberan est a. Girewteyanê sîyasîyan veradê, caardişê qayûman biqedênê û huqûqî bikerê hakim.”
