Seba ke Hepisxaneyan de girewteyanê sîyasîyan rê teda yeno kerdiş û girewteyê ke cezaya xo qedîya û bi kêyfî nênê raverdayene, Şubeya TUHAY-DER’î ya Çûkûrova verê Edlîyeya Mersînî de eşkerayîyêk daye û vat: “Hepisxaneyan de teda roj bi roje hîna giran bena.”
Şubeyê TUHAY-DER’î ya Çûkûrova derheqê teda û taloqkerdişê cezayenê girewteyenê sîyasîyan verê Edlîyeya Mersînî de eşkerayîyêk kerde û vat: “Hepisxaneyan de teda roj bi roje hîna giran bena.”
Eşkerayî de pankartê, “Heqê tehlîyebîyayene nêno peyde eştene” ame akerdiş û siloganê “Bijî Berxwedana zîndanan” ameyî eştene.
Eşkerayîyake hetê Hemseraka TUHAY-DERî ya Şubeya Çûkûrova Adalet Kurane ra ameyê wendene wina ya:
“Çapemenî û Raya Pêroyî rê
Prosesê Aştî û Komelê Demokratîkî ke ma tede yê nêzdîyê di serran o dewam keno. Bi vengdayîşê Birêz Abdullah Ocalanî reyde demêko newe yê bêpêkewtişî dest pêkerd û hêvîyê derheqê aştî de roj bi roje tayê hîna gird bîyî. Wexto ke dayîkî û keyeyî tam prosesêko winasî de bi hêvî û bawerî pawenê ke berê hepisxaneyan abîyê, seba hepsîyanê sîyasîyan ê hepisxaneyan zî nê prosesî coş û hêvîyêka girde viraşta. Pawitişê hepsîyanê sîyasîyan no yo ke biresê azadîya xo, bi lezabezî beşdarê cuya komelkî ya demokratîke bibê û bi şertanê azadan piştî bidê nê prosesî.
La rewş seba keyeyan û hepsîyanê sîyasîyan wina bo zî, tabloyê verê çiman yê hepisxaneyan û binpaykerdişanê heqan ê ke bi îsrar dewam kenê vejîyeno meydan qet zerrîakerdox nîyo. Bitaybetî mexdûrîyetê hepsîyanê sîyasîyan ê ke cezaya înan qedîyaya zî tehlîyeyê înan yenê taloqkerdene û bi veşnayîşê înfazan resayîşê înan ê azadîye yeno astengkerdene, dewam kenê.
Demêk de ke seba pêtbîyayîşê sîyasetê demokratîkî û mendebîyayîşê aştîya komelkî cehdî dewam kenê, dewamkerdişê pratîkanê ke îradeyê azad ê komelî û beşdarîya ci ya cuya demokratîke qels kenê, vernî vindertişêko cidî virazeno. Polîtîkayê şerê taybetî tena bi metodanê leşkerîyan sînordar nîyê; ê hedef gênê ke dinyaya fikrî, erjê exlaqî û îradeyê polîtîk ê komelî ser o tesîr bikerê û komelî erjanê ey ê eslîyan ra durî bikerê.
Ganî binpaykerdişê heqan ê ke hepisxaneyan de bi îsrar dewam kenê û mexdûrîyetê hepsîyanê ke cezaya înan qedîyaya zî nêyenê tehlîyekerdene, nê hetî ra zî bêrê erjnayene. Çîyê ke benê mojnenê ke hepisxaneyan de teda roj bi roje hîna giran bena. Halbûkî no proses ke ma tede yê mecbûr keno ke rewş bêra asayîkerdene û hîna edaletwaz û wijdanî bêra kerdene.
Coka ma tîya ra verê verkan Birêz Serokkomarî rê, Wezaretê Edaletî rê, dezgehanê dewlete yê eleqedaran û berpirsîyaran rê bi awayêko eşkera veng danê:
Prosesê Aştî û Komelê Demokratîkî ke ma tede yê, heme şaran û her beşê komelî de hêvî, bawerî û qerardarîye keno gird û dewam keno. Seba ke nê pawitişî bibê raştî, ganî bêhuqûqî ke problemanê kangrenbîyayeyan ê welatî ra yew a biqedîyo, resayîşê heme hepsîyanê hepisxaneyan ê azadîye bêro temînkerdene, pratîkê ke sîye danê prosesî bêrê hewanayene û gamê şênberî ke do rayîrê aştî akerê bi lezabezî bêrê eştene.”
