Îran de girewteyê ke tewrê “Kampanyaya Roja Sêşeme Darderdişan rê Nê” biyî, hewteyê 129. de 58 zindanan de çalakîya grevê vêşanîye domnenê. Kampanya pare kerd ke di serranê peyênan de Îran de tewr kêm 3 hezar û 888 kesî ameyî dardekerdiş.
Îran de, “Kampanyaya Roja Sêşeme Darderdişan rê Nê” hewteyê 129. de 58 zindanan de çalakîya grevê vêşanîye hepisxaneyanê cîyayan de domnena. Ame dîyarkerdene ke no hewte girewteyê Zindanê Brojenî zî beşdarê çalakî bîyê.
Eşkerayîya kampanya de ame dîyarkerdene ke dima ke Serekkomarê Îranî Mesud Pezeşkîyan dest bi wezîfeyî kerd, nê di serran de dardekerdiş zaf zêdîyayê û nê wextî de tewr kêmî 3 hezar û 888 merdimî ameyî dardekerdiş.
Ame vatene ke hukmat seba astengkerdişê protestoyanê komelkî dest erzeno dardekerdişî û tewr peyên hewteyê vîyarte de Zindanê Adilabadî yê Şirazî de yew cinîya 52 serrî ameya dardekerdiş. Bi taybetî cezaya dardekerdişî seba girewteyanê ke protestoyanê Kanûna 2025î de ameybî girewtene dewam kenî.
Seba 12 girewteyanê polîtîkan qerarê dardekerdişî
Eşkerayî de ame dîyarkerdiş ke dewa Meydanê Alîhanî yê Îsfahanî de seba 12 girewteyanê polîtîkan qerarê dardekerdişî ameyo dayîş. Nê merdiman ra tayê wextê girewtemendişî de gede biyî û no qerar vera Peymana Heqanê Gedeyan o.
Sewbîna 10ê temmuze de Zindanê Evînî de qawîşê cinîyan de hêzanê asayîşî hêrîşê girewteyanê polîtîkan kerd ke înan seba zêdebîyayîşê kapasîteyê qawişî protesto kerdbi. Zindanê Qizilhîsarî de zî girewteyan seba wedaritişê 6 kesanê ke erşawitê hucreyê dardekerdişî, dest bi grevê vêşanîye kerd.
Vengdayîşê Kampanya
Kampanya seba girewteyanê Zindanê Qizilhîsarî ke cezaya dardekerdişî înan rê ameya dayene, fikarê xo pare kerdî û veng da raya pêroyî ke seba nê girewteyan vengê xo berz bikerê ke seba ke beşdarê protestoyan bîyê û ameyê girewtiş.
Mabênê 58 zindanan de ke tewrê grevê vêşanîye bîyî, zindanê sey Evîn, Qizilhîsar, Zindanê Girs ê Tehranî, Karçak, Tebrîz, Urmîye, Meşhed, Şîraz, Ahvaz, Kîrman, Senendec, Kirmanşan û Brojen est î.
