Hepisxaneyê Ewleyî yê Berze ya Ereglî ya Konya de girewteyan rê teda yeno kerdiş û 7 girewteyê ke cezaya xo qedîya bi kêyfî nênê raverdayene.
Hepisxaneyê Qezaya Ereglî ya Konyayî de girewteyanê sîyasîyan ra hetê îdareyê hepisxaneyî û dozgerê hepisxaneyî ra teda virazîyena û veradayîşê 7 girewteyan ame taloqkerdene.
Keyeyê girewteyan, ke ewro seba dîyayîşê girewteyanê xo şîyî hepisxane, vat ke problemê girdî estê. Keyeyan ajansê ma rê vat: “Dozgerêko newe ameyo hepisxane. Amayişê nê dozgerî na het, veradayîşê 7 girewteyan ame taloqkerdene, atolyeyê înan 5 rojan ra ard war kerd 2 rojan û seetê înanê hewa girextene zî kêmî bîyî. Tayê wextan ke girewteyî mîyanê xo de qisey kenê yan zî dilekçe nusenê, vanê: ‘Seba Rayberê Şarê Kurdan Abdullah Ocalan’ dozer vano ‘şima ganî vajê serekê terorîstan’, seba rêxistinî zî ganî vajê terorîst.’ Tayê wextan wexto ke girewteyî şenê koxuşan, înan rê heqaret kenê û înan rê bi nêveradayîşî tehdîd kenê. Wexto ke girewteyî yenê berdene nêweşxane, destanê înan ser o 2 kelemçeyan girê danê, înan ser o tedaya psîkolojîke kenê. Hepisxane hetê hîjyenî de zî pak nîyo û her daîm boya leximî yena, boya leximî ra nêeşkenê pencereyê xo akerê.”
Girewtêyan vat: “Eke nê problemî demêko kilm de çareser nêbê ma endî mecbur manenîme ke dest bi çalakîyanê nêvejîyayena telefonan û dîyayena keyeyan bikim.
Keyeyê girewteyan seba ke nê problemî çareser bibê ÎHD, parlamento û partîyanê sîyasîyan rê vengdayiş kerd.
