Îranî vat ke, ma 2 dronê DYAyî ardî war, DYAyî zî vat ke, ma Girawa Keşmî ser o hêrişê “defansî” kerdî. Trumpî zî tehdîdê hêrişêko newe kerd. Yemen, Xeze û Libnan de zî çend herêman de teqîyayîşî bîyî.
Hişkîye Rojhelatê Mîyanênî de roj bi roj bena zêde. Hetêk ra hêriş, heto bîn ra diplomasî û eşkerayîyê tehdîdî ameyî kerdene. Şewa vêrde ye de çend welatan de rewşêko hereketin bî.
Îran
Fermandarîya Hêzanê Hewayî yê Artêşa Pasdaranê Şoriş ya Îranî vat ke Girawa Keşmî, ya ke Neqebê Hurmuzî de ca girewta, başûrê ci de 2 dronê MQM-170 yê DYAyî ameyî war ardene. Heto bîn ra medyaya Îranî vat ke Girawa Keşmî de 5 vengê teqîyayîşî ameyî eşnawitene, û ame vatene ke teqîyayîşî pey pey bîyî. Selahîyetdarê Îranî ra heta nika derheqê teqîyayîşan de eşkerayîyêko resmî nêame dayene. Ajansê Xeberanê Fars ê nîmresmî vat ke vengê teqîyayîşî ke deryayî ra yenê, bajarê limanî yê Bandar Lengeh de zî ameyî eşnawitene.
Heto bîn ra ame vatene ke DYAyî Hurmuz de hêrişê hewayî yê “defansî” kerdî. Gorê xeberanê medyaya ABDyî, artêşa DYAyî Neqebê Hurmuzî de operasyonê ke selahîyetdaran ci rê “hêrişê defansî” vat, caard.
Eşkerayîyê ABDyî yê derheqê Îranî de
Cîgirê Serekkomarî ê DYAyî JD Vanceyî vat ke ma Îran reyde çend gamî eştî û ma derheqê pêkerdişê bi muzakereyî de zaf hêvîdar ê. Vanceyî vat: “Serekkomar (Donald Trump) û ez derheqê pêkerdişê bi muzakereyî de zaf hêvîdar ê. Ma xebata xo dewam kenê. Raştî ra ma çend gamî eştî. Bivîne, ma eşkenê vêşî bikerê?” Vanceyî vat ke Îran hetê ra tayê nêtexmînkerdeyî yo, û destê Trumpî rê Îran ser o “weçînayîşê leşkerî û nêleşkerî” est ê.
Trump: Eger pêkerdiş nêbo, hêrişî dest pê kenê
Serekkomarê DYAyî Donald Trumpî vat ke eger pêkerdiş nêbo, beno ke ABD ganî Koyê Kazmayî yê Îranî (Pickaxe Mountain) ser o hêriş bikero. Trumpî eşkerayîya ke daye Fox Newsî de vat: “Beno ke ganî ma Pickaxe dima şêrê. Ma eşkenê nê yew saet de, wextê ke wazenê, bikerê.”
Trumpî, ke îhtîmalê şerê newe bîyayîşî teber nêkerd, vat: “Eger ê pêkerdiş nêkerê, no beno. Labelê ê zaf wazenê ke pêkerdiş bikerê û îhtîmalê pêkerdişê ma zaf berz o. Eke bieşkê pêkerdiş bikerê, ez ey tercîh kena, çike no zaf ganî rizgar keno.”
Hêrişê Îsraîlî yê vera Filistînî
Artêşa Îsraîlî Şeridê Xezeyî de çend herêman rê hêrişî kerdî. 7 Filistînijî ganê xo ra bîyî, 2 înan ra verê de birîndar bîyî. Artêşa Îsraîlî bajarê Xan Yunis yê başûrê Xezeyî, dewa el-Masdar a mîyanê Xezeyî û bajarê Xeze yê vakurî hedef girewt.
Datayanê peyênan de ame vatene ke Xeze de teşrîna verêne ya 2025î ke adirbest ca girewt, hêrişanê Îsraîlî de hezar û 593 kes ganê xo ra bîyî, 5 hezar û 748 kes birîndar bîyî û cenazeyê 847 kesan binê xirbanê awanîyan ra ameyî vejîyayene. Hêrişê Îsraîlî yê vera Şeridê Xezeyî ke dest pêkerdî ra heta nika, hûmara pêroyî ya kesan ê ke ganê xo ra bîyî bî 74 hezar û 609, hûmara birîndaran zî bî 175 hezar û 872.
Muxabirê El Cezîreyî ame destbendkerdene
El Cezîre eşkera kerd ke Şeriaya Rojawanî de, qesebeya Dura ya başûrê Hebronî de, hêzanê Îsraîlî keyeyî rê sereştişêk kerd û muxabirê ci Montaser Nassar destbend kerd.
Hêrişê vera Libnanî
Ajansê Xeberanê Neteweyî yê Libnanî (NNA) rapor da ke hêzanê Îsraîlî qesebeya Khiamî çekanê giranî reyde guleyî varnayî û Bani Haiyyan ser o fişekê roşnayî eştî.
Yemen de pêkewtişî
Hêzanê hukmatî yê Yemenî eşkera kerd ke Wîlayetê Lahijî yê başûrê rojawanê welatî de tayê mewqeyî Hûsîyan ra peyser girewtî. Hetê hêzanê hukmatî ra ame vatene: “Hêzê ma yê çekdarî serkewtî ke Lahijî yê vakurî de, Qezaya El-Makatirahî, bin-herêmê El-Sevalihahî, Cebheyê El-Nusayrahî de herêmê El-Hazzan El-Ahmarî de mewqeyî peyser bigîrê û milîsanê Hûsîyan ê terorîstan dûrî bikerê.”
Ame vatene ke hêzan Cebheyê El-Makatirahî de herêmanê Muayq û Ananî de milîsanê Hûsîyan reyde pêkewtî.
