Amed – DBP’yî bi munasebetê 1ê teşrîna peyêne, Roja Kobanî ya Dinya, eşkerayîyêka nuştekî pare kerde. Eşkerayîye de ame dîyarkerdiş ke ganî îradeya Kobanî bibo bingeyê ameyoxê demokratîkî yê Rojhelatê Mîyanênî.
Partîya Herêmanê Demokratîkan (DBP) bi munasebetê 1ê teşrîna peyêne, Roja Kobanî ya Dinya, eşkerayîyêka nuştekî pare kerde. Eşkerayîye de ame vatiş ke şarê dinya eşkenê seba cuyêka bişerefe û ameyoxêko seyyewbîn û azade îradeyêka pîyayîye xo ver bidê.
DBP’yî bale ante prosesê xelesnayîşê Kobanî ser û wina va: “Her çiqas nê demanê tarîxîyan ser ra 12 serrî vîyartê zî xelesnayîşê Kobanî ewro her hetî ra taybetîyanê xo yê sîyasîyan û komelkîyan pawena. Piştîdayîşo ke 1ê teşrîna peyêna 2014î de Kobanî de xo mojna, bî nîşaneyê pawitişê erjanê merdimîye û mucadeleyê pîyayî yê şaran. Xoverdayîşo ke şexsê Kobanî de o wext vejîya meydan, mojna ke şarê dinya eşkenê seba cuyêka bişerefe û ameyoxêko seyyewbîn û azad îradeyêka pîyayîye dewam bikerê. Coka pawitişê qezencanê Kobanî tena seba şarê kurdî ney, seba heme şaranê Sûrîye û Rojhelatê Mîyanênî zî cayêko muhîm gêno. Ganî netîce û qezencê ke Kobanî ra vejîyayî, binê sîstemêkê de bêrê pawitiş ke temsîlîyetê seyyewbînî, azadîya cinîye û komelêko demokratîk esas gêno.”
DBP’yî eşkerayîya xo de bale ante rengînîya Sûrîye ser û derheqê babete de nê çîyî vatî: “Nê esasî ser o ganî ameyoxê Sûrîye feraseta yewperest û merkezperest ser o ney, ser pawitişê erjanê azadîya nasname, kultur, ziwan û îradeya demokratîke bêro awankerdiş. No zî tena bi entegrasyonêko demokratîk mumkin o ke ewro rojeva herême de yo. Na çarçewa de bi entegrasyonê demokratîkî ganî Sûrîye de statu û heqê kulturî, ziwanî û sîyasîyî yê kurdan, elewîyan, ereban, durzîyan û şaranê bînan esasanê qanûnê bingeyî ser o bêrê awankerdiş. Bi sîstemêkê seyyewbîn û demokratîk ruhê Kobanî do erdnîgarîya Rojhelatê Mîyanênî de daîmî bibo û do bibo bingeyo esasî yê cuyêka newe.”
DBP’yî peynîya eşkerayîya xo de şehîdê xelesnayîşê Kobanî vîr ardî û wina va: “Bi nê vengdayîş û hêvî, bi munasebetê 1ê teşrîna peyêne, Roja Kobanî ya Dinya, ma reyna şehîdanê ke erdê Kobanî û Rojavayî ser o cuya xo vînd kerda, bi rêz û bi minet vîr anê. Ma na roja tarîxîye reyna pîroz kenê û silam kenê.”
