Êlih – Şûbeya SES’î ya Êlihî kongreya xo ya 12. kerde. Hemserekê SES’î yê Êlihî yo verên Cîhan Tuzunî dîyar kerd ke keda cinîye nêyena hesabkerdiş û xoza yena talankerdiş. Ey îfade kerd ke piştîdayîşê komelkî yê weşîye zî yeno şikitiş.
Şûbeya Sendîkaya Kedkaranê Weşîye û Xizmetê Komelkî (SES) ya Êlihî kongreya xo ya 12. Salonê Tahîr Elçî yê Baroyê Êlihî de kerde. Îdarekar û endamê SES’î, DEM Partî û DBP’yî yê şaristanî tewrê kongreyî bîyî. Hemşaredarê Êlihî Gulistan Sonuke û Yeşîl Işik, ÎHD, OHD, TJA û zaf kesî zî uca bîyî. Salon de fotografê xebatkaranê weşîye yê ke cuya xo vînd kerda û pankartî ameyî daliqnayîş. Pankartan ser o nê sloganî nusîyayebî: “Ma lîyaqet wazenê, mulakat ney”, “Vera şerî aştîye, vera merdena cuye”, “Îxraçkerdeyî şerefê ma yê”, “Karêko emnîyetin, ameyoxêko emnîyetin” û “Şîdetê warê weşîye polîtîk o”. Kesanê ke salon de bîyî seba kesanê ke mucadeleyê weşîye de cuya xo vînd kerda, deqîqeyêka rêzgirewtişî girewte.
‘Ma xoverdayîşê modernîteya demokratîke pawenê’
Hemserekê SES’î yê Êlihî yo verên Cîhan Tuzunî beşdaran rê xêrameyîş kerd û wina va: “Ma xizmetê weşîye û xizmetê komelkî yo pêroyî, bêpere û bikalîte û ardimê bi ziwanê dayîke pawenê. Ma heqanê kedkaran pîya heqê weşîya komelî berz kenê. Eynî wextî de ma mucadeleyê heq, azadî û demokrasî dewam kenê. Nê sîstemî de weşî, perwerde, xizmetê komelkî û cuye bi xo zî benê çîyê ke eşkenê bêrê herînayîş û rotiş. Kedkar heta ke ‘berhemdar’ bo qîymetin o, nêweş heta ke hêzê ey ê peredayîşî bibo xizmet gêno. Keda cinîye nêyena hesabkerdiş, xoza yena talankerdiş, piştîdayîşê komelkî yeno şikitiş. Vera naye ma xoverdayîşê ‘modernîteya demokratîke’ pawenê.”
‘Ma zaf xebatî pîya kerdê’
Hemşaredara Êlihî Gulistan Sonuke zî wina va: “Weşî hetê kurdan ra zaf qîymetin a û bedelê aye zaf giran ê. Ê ke nê bedelê giranî dayê, înan ra yew zî warê kede ra SES o. Coka no çîyêko zaf pîroz û qîymetin o. Hetanî nika prosesê şerî de ma zaf waran de pîya mucadele kerdo. Hetêk ra karê sîyasî, hetê bînî ra keda embazanê ma yê sendîka de zêde bîye. Ma nika kewtê merheleyêka newe. Heta nika cehdê ma no bî ke ma estbîyayîşê xo bidê qebulkerdiş. No ame qebulkerdiş. Na sewîyeya ke ma resayê zî sayeyê heme embazanê ma yo ke cebheyanê şerî de şer kerdo û cuya xo vînd kerda. Şîdetê vera cinîye her roje zêde beno û xo reyde pûçbîyayîş ano. Warê weşîye de nê problemê ke yenê cuyayîş, nêeşkenê bêrê ziwan û bibê cayê munaqeşeyan.”
Kubra Aşnî Kaya û Sefdar Emûk sey hemserekanê neweyan ê Şûbeya SES’î ya Êlihî ameyî weçînayîş.
