Colemêrg – Hamîde Kuşar dayîka Tîtan Kuşarî ya. Tîtan Kuşar serra 2017î de Rojavayê Kurdistanî de pêrodayîşêk de cuya xo vînd kerdbî. Hamîde Kuşare waşt ke bireso mezelê lajê xo.
Tîtan Kuşar (Ozgur Marufî) serra 2013î de tewrê Têgêrayîşê Azadîya Kurdistanî bîbi. Serra 2017î de zî pêrodayîşêk de şehîd bîbi û agahîya ey resaybî keyeyî. Sey zaf ciwananê kurdan, na agahî ra teber derheqê Tîtan Kuşarî de tu agahîyêka bîne çin a. Yeno zanayîş ke o Rojavayê Kurdistanî de şehîd bîyo. Dayîka Tîtan Kuşarî Hamîde Kuşare waşt ke aye rê îmkanî bêrê dayîş. Aye wazena ke şêra Rojavayê Kurdistanî, mezelê lajê xo bigêro û bivîno.
Hamîde Kuşare dîyar kerd ke wexto ke Tîtan hema qij bî, mêrdeyê aye merdbî. Aye Tîtan bêpî kerdo pîl. Hamîde Kuşare îfade kerd ke Tîtanî mekteb wendêne û wina va: “Lajê mi wendekar bî. Wexto ke sêwir mend, hema qij bî. Mi û birayanê ey o kerd pîl. Yewo zaf rind bî, her hetî ra zaf qîymetin bî. Têkilîyê ey yê mi, keyeyî û embazanê ey reyde zaf rind bî. 8 serrî xebatanê şaristanî de xebitîya û dima şi resa embazan.”
‘Ez wazena ke mezelê lajê mi bibo’
Hamîde Kuşare ard ziwan ke heta nika agahîya şehîdbîyayîşî ra teber derheqê lajê xo de tu agahî nêgirewta. Aye nêzanayo ke lajê aye senî cuya xo vînd kerda û mezelê ey kotî de yo. Aye waştişê xo wina dîyar kerd: “Heta nika ma tu agahîyêka raşte nêgirewta. Tena ma zanayêne ke şîyo Rojava û uca şehîd kewto. Yewî serra 2017î de Rojavayê Kurdistanî ra vatbi ke nameyê ey Kovara Şehîdan de vîyareno. Naye ra teber 9 serrî yo ke ma tu agahî nêgirewta. Ez wazena ke eşkera bibo ey senî û kotî de şehîd kewto û ez şêra bivîna. Ez wazena ke mezelê lajê mi bibo.”
‘Hêvî û waştişê derheqê prosesî de’
Hamîde Kuşare peynîya qiseykerdişê xo de Prosesê Aştîye û Komelê Demokratîkî zî erjna. Aye hêvî û waştişê xo wina ardî ziwan: “Proses rind o û înşallah hîna rind bibo. Homa şehîdan ra razî bo û ê ke mendê zî Homa bipawo. Înşallah êdî do weşî kewo mîyanê merdimîye. Ez wazena ke no proses netice bido, berê hepisxaneyan akerîyê û heme girewteyî bêrê veradayîş.”
