Îzmîr – Heyetê DEM Partî hepisxaneyanê Herêma Ege de girewteyanê sîyasîyan reyde pêvînayîşî kerd. Heyetî eşkerayîya xo de dîyar kerd ke binpaykerdişê heqanê girewteyan dewam keno. Heyetî îfade kerd ke demokrasî bi veradayîşê girewteyanê sîyasîyan mumkin a.
Heyet ra parlamentera DEM Partî ya Şirnexî Nevroz Uysal Aslane, parlamenterê Îzmîrî Burcugul Çubuke û Îbrahîm Akin, parlamenterê Colemêrgî Vezîr Parlak û Onur Duşunmezî ware ameyê. Heyetî hepisxaneyanê Herêma Ege de girewteyê sîyasîyî zîyaret kerdî.
Heyetî 26 û 27ê teşrîna verêne de Hepisxaneya Emnîyeta Berze (YGC) ya Buca Kiriklarî û Hepisxaneyanê Tîpê F yê Hûmare 1 û 2 de pêvînayîşî kerdî. Heyetî 28 û 29ê teşrîna verêne de zî Alîaga de Hepisxaneya Cinîyan a Şakranî û Hepisxaneyanê Racnayeyan ê Hûmare 1, 2 û 4 de pêvînayîşî kerdî.
Zîyaretî do meşte Hepisxaneya Tîpê S ya Bodrumî de bi pêvînayîşan dewam bikerê.
‘Tecrîdê girewteyan dewam keno’
Heyetî badê pêvînayîşanê Hepisxaneya Şakranî eşkerayîyêk daye. Bi nameyê heyetî Nevroz Uysal Aslane qisey kerd. Aye dîyar kerd ke Tirkîya de şertê îzolasyon û tecrîdî yê hepisxaneyanê Tîpê F û YGC heme hepisxaneyan de hîna zaf yenê dîyayîş. Goreyê aye no rewş badê girewtişê Rayberê Şarê Kurdî Abdullah Ocalanî dest pêkerd. Aye wina dewam kerd: “Ma dî ke Buca de hepisxaneyanê YGC û Tîpê F de têkilîya girewteyan a yewbînan reyde ameya kêmkerdiş. Çalakîyê komelkî sey ke qanûnî de nusîyayê nîyê. Nê çalakîyî bi hawayêko cîyakarane waşt û keyfê îdareyî ra ameyê verdayîş. Îdare waştişanê pêvînayîşî yê girewteyanê sîyasîyan dereng cewab dano yan zî qet cewab nêdano. Reyna ma dî ke pratîkê zeptkerdişê azadîya girewteyan dewam kenê. Nê pratîkî bi Heyetanê Îdare û Nezaretî yenê kerdiş ke serra 2021î de kewtî meriyetî.”
‘Şakran de ferzkerdişê nasnameyî dewam keno’
Nevroz Uysal Aslane qetî kerd ke Şakran de 3 girewteyê cinî est ê ke cezayê muebetî gênê. Hewşa umûmîye înan rê ameya astengkerdiş. Aye wina va: “Ferzkerdişê nasnameyan ê girewteyan dewam keno. No caardiş wexto ke girewteyî kargoyan gênê, wexto ke vejîyenê hewş û wexto ke şonê pêvînayîşê avûkat û keyeyan de yeno kerdiş. Girewteyê ESP’yî 2 aşme yo ke ardê îta. Ma dî ke nê girewteyî heqanê sporî, hewşî û çalakîyanê komelkîyan ra îstîfade nêkenê.”
‘Materyalê kurdkî yenê astengkerdiş’
Nevroz Uysal Aslane ard ziwan ke girewteyê nêweşî birînanê xorînan ê Tirkîya ra yew ê. Aye derheqê girewteyanê nêweşan de nê agahîyî dayî: “Na meseleye de hetê huqûqî, heqê merdiman, edalet û wijdanî est ê. Ma dî ke îta verê resayîşê girewteyan a weşîye de astengî est ê. Nê astengî hende aver şîyê ke heqê cuyayîşî yê nêweşan kewto tehluke. Zaf girewteyan zaf reyan ard ziwan ke ganî babet bi hawayêko şexsî ney, sey problemêkê strukturî bêro destgirewtiş. Heme hepisxaneyanê ke ma uca de pêvînayîşî kerdê, ma dî ke helwestê astengkerdişî yê vera weşanayîşanê kurdkî dewam kenê. Mektubê kurdkî bi mane ke yenê wendiş, dereng yenê dayîş. Kovarê kurdkî, kitab, roman û kitabê şîîran yan qet nêyenê dayîş yan zî badê aşman yenê dayîş. Ma eşkenê vajê ke caardişo cîyakarane û dişmenane yo vera kurdkî dewam keno. La her pêvînayîşo ke ma kerd de, ma bawerî û hêvîya azadîye ya heme girewteyan reyna dîye.”
Nevroz Uysal Aslane dîyar kerd ke Prosesê Aştîye û Komelê Demokratîkî de rayîrê sîyasetê demokratîk û huqûqî veradayîşê girewteyanê ke hepisxaneyan de yenê tepiştiş ra vîyareno.
