Murat Karayilanî keyeyanê şehîdanê Şengalî rê mesajêk erşawit

Endamê Fermandarîya Merkezê Pawitişê Şarî (NPG) Murat Karayilanî şarê Şengalî û keyeyanê şehîdan rê mesajêk erşawit.

Mesajê Murat Karayilanî wina yo:

“Seba şarê ma yê Şengalî silam û hurmet;

Nê embazê ke ma nika wazenê bidê zanayîş û vîrardişê înan bikerê, 7 embazê Şengalî yê. Ma nê embazan pêrune şexsê embazan Agir Botan-Nizar Enad Muxêbîr û Çîçek Ocalan-Nûra Xêro de bi hurmet û bi minet vîr anê. Ma verê vîrardişê înan sereyê xo nanê ro û sozo ke ma şehîdanê qehremanan rê dayo, reyna tekrar kenê. Ma do heta peynî sadiqîya embazîye rê girêdaye bimanê.

‘Fermanê 74. bê hesab nêame verdayîş, sîstemê DAÎŞ’î ame wêrankerdiş’

Ez bi nameyê Îdareyê Têgêrayîşê ma û bi nameyê Qerargehê ma yê Merkezî, keyeyanê nê şehîdanê qîymetinan û heme şarê ma yê Şengalî rê serweşî wazena. Hem şarê ma yê êzidî hem zî şarê ma yê ereb rê serweşî wazena, çunke mîyanê înan de embazê erebî zî est ê. Ez hêvî kena ke şarê ma do nê şehadetanê muhîman rê manaya înan bido û nê esasî ser o rayîrê şehîdanê qehremanan de hereket bikero. Wina do înan vîrî xo biyaro û goreyê layîqîya şehîdanê qehremanan înan pêşwazî bikero.

Embazê qîymetinî, keyeyê bişerefî;

Hetanî nika şarê ma yê êzidî ser o 74 fermanî virazîyayî. Her fermanî qetlîam û jenosîd ardo. La zafêran ra hesab nêame persayîş. Kamî ke ferman kerd, cezaya xo nêdîye. La ma zanê ke bi fikr û ramanê Rayber Apoyî, hişyarîya Rayber Apoyî mîyanê ma û mîyanê şarê ma de aver şîye. Coka fermanê 74. bê hesab nêmend. Raşt o, reyna qetlîam virazîya. 12 hezar merdimî ra zafêr ê ma şehîd bîyî û esîr bîyî. La amancê dişmenan ê DAÎŞ’î pîl bî. DAÎŞ’î waşt ke koka êzidîyîye wedaro û biqedno. La sey ke ma va, gerîlayê azadîya Kurdistanî yê ke bi perspektîfanê Rayber Apoyî hereket kenê, vera naye nêeşkayêne temaşekerdox bimanê. Înan hema ke eşnawit, qerar da û kewtî hereket. No yeno zanayîş. Wina verê fermanî ame girewtiş. La bi naye nêmend. O wext tu kes vera DAÎŞ’î nêvindertêne. Dewlete ver ra remayêne, her kes ver ra remayêne. Mudaxeleya şerê Şengalî zaf kesan rê cesaret da. Vera naye zî DAÎŞ’î va: ‘Senî eşkenê vera ma vindî?’ Tecrubeyê înan yê koyan çin bî. Koyan de nêeşkayêne vera gerîlayanê ma şer bikerê, yanî bi zor koyan îşxal bikerê. Tecrubeyê înan yê deşt û şaristanî est bî. Coka înan dî ke cayê ma yo qels Kobanî yo. Înan seba ke heyfê xo bigîrê, hucumê Kobanî kerd. Têgêrayîşê ma hem hesabê destdergîya înan a Şengalî ser hem zî hesabê destdergîya înan a Kobanî ser pers kerd. O wext ame dîyarkerdiş ke no hesab do zaf bi xorînî bêro persayîş. Tena zereyê Şengal û Kobanî de ney, her ca de do no hesab bêro persayîş. O wext wina ame vatiş. Yanî heyfê keynan û cinîyanê ma yê kurdan û êzidîyan, heyfê şehîdanê ma yê fermanî ame girewtiş. Sîstemê DAÎŞ’î sereyê DAÎŞ’î de ame wêrankerdiş. Reqa ke înan paytext îlan kerdbî, sereyê înan de ame wêrankerdiş. Fedaîyê Apoyî heta ke waşt dimayê înan şîyî û sîstemê înan wedarit. Sebebê naye karê înan bî ke Şengal de kerdbî. Sebebê naye wehşetê înan bî ke Şengal de kerdbî. Yanî hesab ame persayîş, gonîya şehîdanê fermanî erd ro nêmende. Tarîx xo tekrar nêkerd. Ferman bê hesab nêmend.

‘Manaya YBŞ û YJŞ’î verê fermanan girewtiş û garantîkerdişê ameyoxê şarê êzidî ya’

Seba ke nê ra pey verê fermanî, yanî fermanê 75., bêro girewtiş, tedbîrê lazimî ameyî girewtiş. Nê tedbîrî hetê ciwananê Şengalî bi xo ra ameyî girewtiş. Mîyanê şerî de YBŞ/YJŞ ame awankerdiş. Bi pêşengîya embazan Mam Zekî, Hesen Seîd, Dijwar Feqîr, Zerdeşt, Berxwedan û Dilgeşî û bi pêşengîya Bêrîvanan gamî ameyî eştiş. Nê gamî seba ke ameyoxê şarê ma yê êzidî rê bibê garantî û bibê hêzêkê pawitişî ameyî eştiş. Seba ke êdî fermanî tekrar nêbê, fermanê 75. nêvirazîyo û tedbîrê ey bêrê girewtiş. YBŞ no yo. Manaya ey na ya. Ciwanê êzidî û dostê ereb pîya no hêz awan kenê. No hêz vera her tewir hucum û destdergîye hêzêkê pawitişî yo ke ganî bieşko şer bikero, xo û şarê xo bipawo. Û ganî daîmî bibo, demkî ney. Nê esasî ser o YBŞ/YJŞ ame awankerdiş. Bi keda şehîdan virazîya. Amancê naye no yo ke reyna ferman nêvirazîyo û ameyoxê şarê êzidî garantî bibo. Wina wayîrê tedbîrî bibo. Şarê ma yê êzidî bi xo xo bipawo û tu kesî ra hêvî nêkero. Bi xo û bi hêzê xo bieşko xo bipawo. Perspektîfê Rayber Apoyî wina yê. Herçiqas kêmasî bibê zî na babet de xebatêk ame kerdiş. Yanî embazê YBŞ’î no kar dewam kenê. Çunke na emanete înan rê ameye teslîmkerdiş. Badê ke ma sey HPG’yî uca ra vejîyayî, êdî na emanete fermandarî û heme pêkhateyanê YBŞ’î rê ameye teslîmkerdiş. Ma bawer kenê ke ê zî nê ra pey do bieşkê bipawê û na wezîfe dewam bikerê.

‘Ciwanê Şengalî ameyî ardimê gerîla û şehîd bîyî’

Şarê ma yê qîymetin, keyeyê bişerefî;

Ma Şengal de şehîdî dayî. Na mudaxeleya gerîla mudaxeleyêka tarîxî û pîroze bîye. Û ma bi nê şehîdan serberz ê, poşman nîyê. Ma nika dî ke ciwanê Şengalî bi xo, xort û keynayê înan, nê rey tewrê rêzanê ma bîyî. Koti? Tena Şengal de ney. Înan waşt ke bêrê koyanê Kurdistanî, Bakurê Kurdistanî. Waşt ke embazîye bikerê û bibê embazê embazan. Û nê ciwanê qîymetinî tewrê ma bîyî, ameyî mîyanê ma û înan ra tayê embazî resayî sewîyeya şehadetî. Û no şima rê serberzîyêk o. Yanî şima mukabilê gerîla cewab da, ciwanê Şengalî zî ameyî ardimê gerîla. No çîyêko zaf qîymetin o. Zaf bişeref o. Çiqas ke ma pê serberz ê, hende zî şima eşkenê heta peynî bi nê şehîdan serberz bê. Biciwîyê şima, biciwîyê keyeyê ke nê şehîdê qehremanî xebitnayê, biciwîyê ê dayîkî. Lajê û keynayê ê dayîkan ê qehremanî Şengal ra ameyî koyanê Kurdistanî, uca kewtî şer û resayî şehadetî. No zî çîyêko zaf qîymetin û bişeref o û heta peynî bi hurmet yeno mojnayîş. Na babet ma rê hetêkê manewî zî est o. Gonî ra girêdayîşêk virazîyayo û no embazîyêka bingeyêne û xorîne ya, bimana ya. Ez bawer kena ke heme şarê ma û heme keyeyê qîymetinî zî naye rê na mana danê.

‘Entegrasyonê YBŞ/YJŞ’î yê sey hêzêkê mehelî do nêverdo ke fermanê 75. virazîyo’

Embazê qîymetinî, keyeyê bişerefî;

Ma bihîsto ke mabênê Fermandarîya YBŞ’î û hukmatê Îraqî de munaqeşeyî est ê. Reyna agahî est a ke pêverkewtişêk virazîyayo. Goreyê nê pêverkewtişî YBŞ do esasê xo ser o resmî bibo. Sey hêzêkê mehelî û xoserî do seba pawitişê Şengalî û şarê Şengalî wezîfeya xo dewam bikero. Beno ke hema temam nêbîyo, la agahîyê winasî est ê. Eke na çarçewa de pêverkewtiş virazîyabo, no çîyêko munasib o, cayê xo de yo û ganî heme şarê ma zî wina pêşwazî bikero. Problemê ma no yo: Fermanê 75. nêvirazîyo. Seba naye tedbîr bibo. Eke na peymane de entegrasyonê ordîya Îraqî bibo û YBŞ sey hêzêkê mehelî seba pawitişê Şengalî daîmî bimano, do bieşko no rol bigêro. Coka no çîyêko cayê xo de û munasib o. Wina do bieşko emaneta şehîdan bipawo. Ma hêvî kenê û bawer kenê ke na çarçewa de endamê YBŞ û YJŞ’î û şarê ma yê Şengalî yo qîymetin do bieşkê berardişanê şehîdanê qehremanan bipawê. Wina do dawaya şehîdan dewam bikerê û şehîdan bikerê kesê nêmerdî. Nê esasî ser o ez reyna şima pêrune rê û keyeyanê qîymetinan rê silam û hurmetê xo pêşkêş kena û serweşî wazena. Ez vana, şehîdî nêmirenê, şehîdî nêmirenê, şehîdî nêmirenê.”