Îdareyê qeyûmî yê Şaredarîya Colemêrgî raporê xo de ke KDK’yî rê erşawito, da zanayene ke deynê înan ê bac û SGK’yî 32 mîlyon û 410 hezar lîreyî yo û heme erebe û milkê sabitî yê şaredarîye ser o heciz ameyo ronayene.
Şaredarîya Colemêrgî ke nêzdîyê 10 serrî yo binê îdareyê qeyûmî de ya, binê deynan de xenekîyaya. Ame zanayene ke îdareyê qeyûmî tu deynê xo nêdayê û coka dezgehê ke şaredarî deyndara înan a, muracatê Dezgehê Kontrolê Pêroyî (KDK) kerdo. KDK’yî şaredarîye ra rapor waşt û da zanayene ke ganî şaredarî rewşa xo ya ekonomîke îzah bikera. Cewabê şaredarîye de vejîya meydan ke heme erebe û milkê Şaredarîya Colemêrgî binê hecizî de yê û şaredarî problemêkê ekonomîkî yê giranî ciwîyena.
Goreyê raporê îdareyê qeyûmî deynê bacî 3 mîlyon û 901 hezar lîreyî, deynê SGK’yî zî 28 mîlyon û 509 hezar lîreyî yo. Bi no hewa deynê bac û SGK’yî bi pêroyî resayo 32 mîlyon û 410 hezar lîreyan. Ame zanayene ke seba heme dosyayanê ke deynê înan nêameyî dayene îcraya mecburî dayîya destpêkerdene û faîzo ke zêde beno, barê deyne giranêr kerdo. Ame dîyarkerdene ke netîceyê nê karanê îcrayî de heme erebe û milkê sabitî yê şaredarîye ser o tedbîrê hecizî ameyî ronayene.
