Goreyê doneyanê ke ameyî weşanayene, aşma teşrîna verêne de Îran de 23 cinî û 5 gedeyî ameyî kiştene, 2 cinî bi hewayêko şikdar merdî û 2 cinî zî ameyî dardekerdiş. Nê doneyî mojnenê ke şîdetê vera cinî û gedeyan resayo kotî.
Xeberê ke aşma teşrîna verêne de Îran de ameyî weşanayene, mojnenê ke şaristananê cîya-cîyayan ê Îranî de cinî hema zî hetê mêrdanê xo yê verênan yan zî endamanê bînan ê keyeyî ra yenê kiştene û gedeyî zî rîyê şîdetî ra mirenê. Sewbîna ame dîyarkerdene ke mîyanê keyeyan de zaf hedîseyê kiştişî benê.
Nê demî de kiştişê cinîyan hetê merdimanê înan ra, veşnayîşê cinîyan, mergê şikdarî û hepisxaneyan de dardekerdişê cinîyan ameyî qeydkerdene. Nê hedîseyan reyna girdîya şîdetê vera cinî û gedeyan ard vernîya çiman û lazimtîya lezabeze ya cigêrayîşê mekanîzmayanê komelkî, huqûqî û pawitişî ard rojeve.
