Dosyaya “torra têkilîyanê tarî” ya tehqîqatê Gulistan Dokuye de, keso ke fotoyê ey ê îşkencekerdişî est ê, nasnameya ey ame tesbîtkerdene. Avûkatê keyeyê Dokuye Ali Çimenî dîyar kerd ke keso ke foto de yo, ê B.D.AK. yo ke mesajê Tuncay Sonelî û Gokhan Ertokî de nameyê ey yeno vatene yo.
Gulistan Doku 6 serrî ver Dêrsim de vînd bîya û ci ra pey xeber nêame girewtene. Tehqîqatê ci de, dosyaya ke “torra têkilîyanê tarî” ra ameya rojdem, rewşêka newîye bîye.
Avûkatê keyeyî Ali Çimenî vat ke bi raporê pisporî tesbît bîyo ke B.D.AK., ke mesajê şikdaran de nameyê ey yeno vatene, û keso ke foto de yo, êy rê îşkence ameyo kerdene, yew kes o. Eşkerayîya Çimenî, tehqîqatê ke mesaj û resnayîşê pereyan Valîyê wextî yê Dêrsim Tuncay Sonelî û Gokhan Ertokî tede est ê, reyna ard rojdem.
‘Her çî lazim o bikerê, bira’
Nuşteyê waştişê tepîştişî yê Serdozgerîya Komarî ya Erzirom, ê 27ê temmuze ya 2026î de, derheqê mesaj û resnayîşê pereyan ke Tuncay Sonelî ser o tehqîqatî de ameyî girewtene de detayan ca girewtî.
Goreyê nuşteyî, tehqîqat 17ê nîsane ya 2026î de, seba kerdeyê Sonelî yê ke karakterê sûcê şexsî de yê, dest pêkerd. Sonel Xarpêt de otêlêk de ameyo girewtene ra pey, adresî, cayê kar û erebeyê ke xebitnenê de gêrayîşî ameyî kerdene. Xeylî materyalê dîjîtalî zî bi ser de ameyî girewtene.
Dosya de iddîayêk zî est a ke Sonelî seba tesbîtkerdene û estişê hesabanê dîjîtalanê ke ey rexne kenê, Gokhan Ertokî ra piştî waşt.
Goreyê nuşteyê serdozgerîyî, seba tesbîtkerdişê karberê hesabî, ke 31ê teşrîna verêne ya 2021î de platforma X de derheqê Sonelî de bi îfadeyê “Patron valîyî reyde …” parekerdişêk kerdbî, gamî ameyî eştene. Vajîyeno ke Sonelî parekerdiş Ertokî rê rusna û vat: “Her çî lazim o bikerê, bira.” Ertokî zî vat ke karberê hesabî tesbît kerdo û fotoyêk rusna.
Mesajan de îfadeyî est ê ke keyeyê ey kesî ame tesbîtkerdene, keye de gêrayîş ame kerdene û materyalê ey yê dîjîtalî bi ser de ameyî girewtene. Mesajê Ertokî ê 2ê teşrîna peyêne ya 2021î de zî ame vatene ke o kes yew şewe destbend kerd û sewbîna serê sibe hetê dozgerî ra ame veradayene.
Nuşteyê serdozgerîyî de zî ca girewto ke mesajan de îfadeyî est ê ke telefon kopîya bîyo, kamerayê verênî û pêyênî eşkenê bêrê dîyayene û keye de tayê cayan de cîhazê goştarîkerdişî ameyî ronayene. Mesajanê dosya de fotoyêkê keso ke darp bîyo û zanayîş o yo ke aydê B.D.A. yî yo.
‘Keso ke ameyo îşkencekerdene ame tespît kerdene’
Goreyê eşkerayîya avûkat Çimenî, şikdaran tehqîqatî de iddia kerd ke keso ke foto de ê yew kesêko binî yo ke seba bîn hadîseyî ci rê qerarê destbendkerdişî ameyo dayene.
Labelê Çimenî vat ke tehqîqat hîra bîyayîş ra pey, raporê pisporî de ke dosya rê ame ardene, tesbît bîyo ke keso ke foto de yo û ameyo îşkencekerdene ey û B.D.A., ke mesajê şikdaran de nameyê ey yeno vatene, yew kes o.
Avûkat Ali Çimenî ney vat:
“Hadîseya ke Serdozgerîya Komarî ya Erzirom ra bi nameyê ‘TORRA TÊKILÎYANÊ TARÎ’ ame tesbîtkerdene de; seba tesbîtkerdişê karberê bi nameyê kukuv99, ke X de derheqê Tuncay Sonelî de ‘Patron valîyî reyde …’ parekerdiş kerdbî, Sonelî, ke seba xeylî sûcan tepîşte yo, WhatsApp ra bi koda Turgay Kiliç, Gokhan Ertokî rê ‘Her çî lazim o bikerê, bira’ talîmat dabî.
Ertokî zî talîmatî ra pey vat ke karberê kukuv99, ke parekerdiş kerdbî, bi rayîrêko bêqanûn ra tesbît bîyo û B.D.A. o. Ey fotoyê kesêkî ke îşkence lê ameyo kerdene şikdar Sonelî rê ruşnabî. Tehqîqatê ke no hadîse ser o ame kerdene de şikdaran sûcî ra red kerd û vat ke kes yew kesêko binî yo ke seba yew hadîseya bîne ci rê qerarê destbendkerdişî ameyo dayene.
Ê tehqîqat derin bî ra pey, raporê pisporî yê fermî ê ke dosya rê ame ardene bi ci ra, kesê ke foto de yeno dîyene û îşkence ameyo kerdene, ‘yew kes o’ ke şikdaran mesajan de nameyê ey yeno vatene, yanî B.D.A., teqez tesbît bîyo.”
