Amed- Li mezraya Qelesî jinên çar malbatan ji bo mehserê hatin cem hev. Jinan bêyî hêza mêran, bi hêza xwe di 2 rojan de basteq û meşlûl çêkirin û wiha gotin: “Gava jin bibin yek tu tişt li pêşiya wan nabe asteng.”
Bi gihîştina tiriyan li gelek herêman dema mehserê hat. Bêguman Amed jî yek ji van herêman e. Li mezraya Qelesî ya gundê Çemê Êlika yê Licê jî bi gihîştina tirî welatiyan dest avêt çêkirina dims, bastîk û cureyên din ên ji tirî çêdibin. Li vê mezrayê jinên çar malbatan hatin cem hev, hêza xwe kirin yek û basteq û meşlûl (benî) çêkirin.
Xebata jinan 2 rojan berdewam kir. Roja yekem jinan bi hev re tirî çinîn, eciqandin û parzûn kirin. Roja duyem jî ava tirî kelandin û basteq û meşlûl çêkirin. Li vir ji jinan re hêza fîzîkî ya mêran hewce nekir. Li ku derê zehmetî dîtin, sê jinan dest dan hev, hêza xwe kirin yek û pirsgirêk çareser kirin.
Kîmya Onkol û Fîrasete Ozbek derbarê xebatên mehserê de ji ajansa me re axivîn.
‘Tirk e lê Dimilkî û çanda Kurdan fêr bûye’
Kîmya Onkol ku eslê xwe ji Gurgûmê ye got ku piştî ew zewiciye fêrî Dimilkî bûye û axaftina xwe wiha da destpêkirin: “Ez ji Mereşê me, ez tirk im. Ez zewicîme û bûme bûka vî gundî. Ez tirk im, loma zimanê zazakî û karê gund ez li vir fêr bûm. Ez paqijkirina axuran, dotina heywanan û gelek karên gund fêr bûm. Her tiştê xwe ez li vir fêr bûm. Em her tiştê xwe li gund çêdikin, pere nadin û tiştekî nakirin. Dema ez zewicîm hevjînê min nexwest li gund bijî, min ew îkna kir ji bo jiyana li gund.”
‘Em alîkariya hev dikin’
Kîmya Onkol ku du rojan bê navber di çêkirina berheman de xebitî behsa danîna mehserê kir û wiha got: “Em berê tiriyan diçînin, paşê şîreyê wan derdixin, paşê jî şîreyê wan dikelînin. Ez van karan nizanim lê hevalên min van dizanin. Loma ew alîkariyê didin min, ez jî alîkariya wan dikim. Ji vê xebatê jî tê fêmkirin ku gava jin destê hev bigirin tu kar tune ye ku nikaribin bikin.”
‘Kar çend zehmet be jî em jin destê hev digirin û karê xwe dikin’
Fîrasete Ozbekê jî ji serî heta dawiyê behsa çêkirina basteq û meşlûlê kir. Fîrasete Ozbekê bal kişand ser zehmetiya kar û wiha axivî: “Ev kar gelek zehmet e. Em gelek westiyan, qewet di me de nema. Lê carekê jî em nabêjin em nakin. Ev jî parçeyekî gund e; em neçar in ku bikin. Lê kar çend zehmet be jî em jin destê hev digirin û karê xwe dikin. Em jin hem karê mêran dikin hem jî yê jinan. Ev dide nîşandan ku jin dema bibin yek dikarin her karî bi serkeftî bikin.”
