UNICEF’î da zanayîş ke Gazze de badê vindarnayîşê şerî zî 351 domanî merdê û venga pawitişê domanan û hesabpersayîşê berpirsîyaran da. Ame qetîkerdiş ke rijîyayîşê sîstemê weşîye weşbîyayîşê fîzîkî û psîkolojîkî yê domanan zehmet keno.
Gazze de ke tesîrê şerî dewam kenê, domanê filistînijî rîbirîyê tehlukeyan ê ke cuye û emnîyetê înan tehdît kenê û neticeyê dergî yê birînanê înan ê fîzîkî û psîkolojîkî hema dewam kenê.
Fonê Domanan yê Neteweyanê Yewbîyayeyan (UNICEF) da zanayîş ke îlanê vindarnayîşê şerî ra nat hûmara domananê ke Gazze de ganê xo ra bîyî, resaya 351. UNICEF’î venga Îsraîlî da ke seba pawitişê domanan û vindarnayîşê merdişê sivîlanê bînan tedbîranê tesîrinan bigîro.
Rayberê Herêmkî yê UNICEF’î yê Rojhelatê Mîyanênî û Vakurê Afrîka dîyar kerd ke seba pawitişê domanan hewcedarîye bi gamanê şênberan est a ke şîdetî kêmî bikerê; ganî rewşanê ke domanî tede yenê kiştiş yan birîndar benê de hesabpersayîşêko zelal bêro garantîkerdiş.
‘6 rojan de 8 domanî merdî’
Rayberî dîyar kerd ke 6 rojanê vîyarteyan de Gazze de 8 domanî merdî û 20 domanî birîndar bîyî. Goreyê rayberî, ganî Îsraîl seba vindarnayîşê kerdişanê şîdetî tedbîranê tesîrinan bigîro, mabênê sivîlan û şervanan de ferq bikero û binê qanûnê merdimîye yê mîyanneteweyî de domanan rê pawitişêko taybet garantî bikero.
Rayberê Herêmkî yê UNICEF’î da zanayîş ke domanê ke nê hêrişan ra bi ganî xelisîyenê, semedê rijîyayîşê sîstemê weşîye yê Gazze û nêeşkayîşê dayîşê xizmetanê tibî yê bingeyênan, weşbîyayîşê xo yê fîzîkî û psîkolojîkî de rîbirîyê astenganê girdan benê. Rayberî qetî kerd ke ganî Gazze de pawitişêko tesîrin yê domanan bêro garantîkerdiş, heqê înan yê binê qanûnê merdimîye yê mîyanneteweyî de rêz bivînê û resayîşê înan yê xizmetanê weşîye yê bingeyênan û piştîdayîşê psîkolojîkî bêro garantîkerdiş.
