Xwendekarê Beşa Ziman û Wêjeya Kurdî ya Zanîngeha Dîcleyê Mazlûm Ozdemîr têkildarî konferansa ciwanên xwendekar ku dê sibe bê lidarxistin da zanîn ku ciwan stûna sereke ya pêvajoyê ne û ev tişt vegot: “Divê ciwan xwe zêdetir pêş bixin û birêxistin bikin. Rola herî girîng a ciwanan ew e ku pêşengtiya vê pêvajoyê bikin.”
Bi pêşengiya Xwendekarên Komunalîst, dê sibe li Navenda Kongreyê ya ÇandAmedê ya Amedê bi dirûşma ‘Bi kampusên komunbûyî re dema rêxistinbûnê ye” konferansek were lidarxistin. Xwendekarên ku ji bajarên Bakurê Kurdistanê û Tirkiyeyê beşdarê konferansê bibin, dê li ser polîtîkayên şerê taybet, rêxistinbûna komunê, pergala perwerdeyê ya li zanîngehan, Pêvajoya Aştî û Civaka Demokratîk û azadiya fizîkî ya Rêberê Gelê Kurd Abdullah Ocalan rawestin û nîqaşan bikin.
Xwendekarê Beşa Ziman û Wêjeya Kurdî ya Zanîngeha Dîcleyê Mazlûm Ozdemîr têkîldarî konferansê ji Ajansa Welat (AW) re axivî.
‘Em hewl didin balê bikişînin ser xwendekaran û bêtir xwendekaran tev li refên xwe bikin’
Mazlûm Ozdemîr da zanîn ku armanca konferansê ew e ku xwendekar û ciwanên ji her devera Bakurê Kurdistanê û Tirkiyeyê xwe birêxistin bikin û wiha got: “Armanca me ew e ku gelo di vê pêvajoyê de dê rola ciwanan çibe? Ciwan ji bo yekbûn û hevgirtinê dê kom bibin û li ser vê yekê biaxivin. Bo nimûne, gava pirsgirêkek li Zanîngeha Dîcleyê derkeve, gelo dê zanîngehên din û komên din çawa piştgiriyê bidin wan û çawa bi hev re xebateke kolektîf bimeşînin? Em ê li ser van rawestin. Xebatên me jî jixwe didomin, em hewl didin balê bikişînin ser xwendekaran û bêtir xwendekaran tev li refên xwe bikin.
‘Pêwîstiya me bi xwe rêxistinkirin û pêşengiyê heye’
Mazlûm Ozdemîr diyar kir ku di pêvajoya aştî û civaka demokratîk de rola herî girîng ya ciwanan e û axaftina xwe wiha bi dawî kir: “Ciwan stûna sereke ya vê pêvajoyê ne. Ji ber vê yekê, divê ciwan xwe zêdetir pêş bixin û bi rêxistin bikin. Rola herî girîng a ciwanan ew e ku ew pêşengiya vê pêvajoyê bikin. Banga me ji ciwan û xwendekaran ew e ku ji her demê bêtir pêwîstiya me bi xwe rêxistinkirin û bi pêşengiyê heye. Em hemû ciwanan vedixwînin konferansê.”
