Rayberê Komela Kultur û Hunerî ya Mamekî ya ke Dêrsim de ame akerdene Kadîr Guneşî, xetereya vîndî bîyayîşê kirmanckî ser o bale ante û vat: “Ma wazenê ke dayîkî û gedeyî bêrê îta, ziwanê xo qisey bikerê û enstrûmanan bimusê.”
Dêrsim de seba ke ziwanê dayîke, kultur û huner gandar bimanê û nesilanê newan rê bêrê resnayene, Komela Kultur û Hunerî ya Mamekî ameyê akerdene.
Akerdişî de rayberê komeleyî Kadîr Guneşî qisey kerd.
Guneşî bale ante ke kirmanckî cuyayîşê rojane de û gedeyan reyde qisey kerdiş kemî maneno. Vat ke ê wazenê komele bibo cayêko ke dayîkî û gedeyî tede bêrê têhet, ziwanê xo qisey bikerê û enstrûmanan bimusê.
Guneşî vatişê “Her vaş serê koka xo de kewe beno” ard vîrî û vat: “Dêrsim de keyeyî ameyî veşnayene û ameyî xirabkerdene, Tertele bîy. Labelê ma hema zî ziwanê xo ra fek nêverda. Ziwanê ma vîndî bîyayîşî reyde rûbirû yo. Kes keye de gedeyanê xo reyde ziwanê xo qisey nêkeno.”
Guneşî vat ke înan komele seba ke ziwanê dayîke û kultur gandar bimano, akerdo û vat: “Ma wazenê ke dayîkî û gedeyî bêrê îta, ziwanê xo qisey bikerê, enstrûmanan bimusê. Reyna koyanê Dêrsimî de kirmanckî gulbengî bêrê dayene. Komeleya ma ya hunerî şarê ma rê xêr bo.”
Qiseykerdişî ra dima akerdişê komeleyî ame kerdene. Dima zî erbane reyde dîlane ameyê girewtene.
