Îstanbul – Dayîkanê Şemeyî hewteyo 1125. yê çalakîya xo de aqûbeta Fehmî Tosunî persa ke 19ê teşrîna verêne ya 1995î de ameybî vîndîkerdene. Cinîya Fehmî Tosunî, Hanim Tosune, dîyar kerd ke dewlete hîkayeya înan, înan ra hîna rind zana û vat: “Eke do behsê aştîye bêro kerdene ganî verê her çî Meydanê Galatasarayî rê bêro ewnîyayene. Ma vîndîbîyayanê xo wazenê.”
Dayîk/Merdimê Şemeyî bi waştişê “Wa Vîndîkerdeyî Bêrê Vînayene, Faîlî Bêrê Muhakemekerdene” hewteyo 1125. de Meydanê Galatasarayî ya Îstanbulî de çalakîya xo ya hewteyîye viraşt. Dayîkê Şemeyî, endam û rayberê ÎHD’yî yê Îstanbulî û xeylî pawitoxê heqê merdiman tewrê çalakîye bîyî. Çalakîye de fotografê vîndîkerdeyan ameyê berzkerdene. Çalakîya nê hewteyî de faîlê Mecît Baskinî zî ameyê persayene ke 1993 de Ankara de ameybî destbendkerdene û kiştene. Metnê eşkerayîye hetê Merdima Şemeyî Îkbal Erene ra ame wendene.
‘Ê do mi bikişê’
Îkbal Erene ard ziwan ke 31 serrî yo aqûbeta Fehmî Tosunî persenê: “Sibaya 19ê teşrîna verêne ya 1995î de Fehmî Tosun (35) ke pîyê panc domanan bî, keyeyê xo yê Avcilarî de embazê xo yo nêzdî Huseyîn Aydemîrî reyde nanê sibayî werdêne. Badê nanê sibayî her di embazî pîya keye ra vejîyayî. O şan, hîrê kesanê çekdaran ê bi kincanê sivîlan, Fehmî Tosunî bi wesayîtêk Renault ya sipîye ya plakaya 34 UD 597 ard verê keyeyê ey. Wexto ke ey cinî û domanê xo dî, qêra û vat: ‘Ê do mi bikişê!’ Înan Fehmî Tosun bi zorî kerd wesayît û berd. Hanim Tosune tavilî şîye Qereqolê Polîsan yê Avcilarî û remnayîşê mêrdeyê xo da zanayene la polîsan vat ‘Çîyo ke ma bieşkê bikerê çin o’ û tu çî nêkerd. Hanim Tosune û ÎHD’yî heme tedbîrê qanûnî girewtî la dewlete girewtişê Fehmî Tosunî înkar kerd. A roje ra nat ne Fehmî Tosun ra ne zî Huseyîn Aydemîr ra tu xeber nêameya girewtene.”
‘Ma waştişê edaletî ra fek veranêdanê’
Îkbal Erene îfade kerd ke keyeyî badê hedîseyî muracatê Dadgehê Heqanê Merdiman ê Ewropa (DHME) kerd: “Dewa ke 2003 de qedîya, hukmatî pawitişê xo de vat ‘Hukmatê ma semedê vîndîbîyayîşê Fehmî Tosunî xemgîn o’. DHME’yî berpirsîyarîya dewlete ya binpaykerdişê heqê cuyayîşê Fehmî Tosunî qebul kerde zî hukmatî wezîfeyê xo yê tehqîqatêko tesîrin nêard ca. Dewa bi qerarê nêmuhakemekerdişî û semedê vîyartişê wextî ameye qefelnayene û îtîrazî zî ameyî redkerdene. Ma reyna venga berpirsîyaranê dadwerî û sîyasî danê: Êdî bes o. Înkar û bêcezayîye biqedênê û dewaya Fehmî Tosunî de edaletî garantî bikerê. Çend serrî ke bivîyarê zî, ma waştişê edaletî ra fek veranêdanê.”
‘Êdî bes o, Medyanî Galatasarayî akerê’
Hanim Tosune dîyar kerd ke dewlete hîkayeya înan, înan ra hîna rind zana: “Êdî behsê heqîqetî mekerê. Çira ewro ma verê barîyeranê polîsan de yê? Ma tîya behsê aştîye kenê. Ma vîndîbîyayanê xo wazenê. Êdî bes o; Meydanê Galatasarayî akerê, ma ra metersê.”
Çalakî qade de bi ronayîşê qerenfîlan qedîya.
