Amed – Rêzefîlmê “Pirsên Azad”, ke reya verêne bi zîrekîya viraşteye û bi kirdaskî ame hedrekerdene, 12ê teşrîna verêne de Zarok TV de dest bi weşanî kerd. Ardimkarê rejîsora rêzefîlmî Erdal Tîmurî dîyar kerd ke zîrekîya viraşteye karê înan rehet kena û ameyox de do hîna zaf zîrekîya viraşteye ser o vindê.
Rêzefîlmê “Pirsên Azad”, ke rejîsorîya ey Ceren Asik Demîre kerda, 12ê teşrîna verêne de Zarok TV de dest bi weşanî kerd. Dublajê rêzefîlmî bi temamî bi kirdaskî yo û vîdeoyê ey bi ardimê zîrekîya viraşteye ameyê hedrekerdiş. Anîmasyon do her hewte bi beşêko newe bêro serê ekranî. Qehremano meraqdar Azad bi persanê xo berê war û zanistanê cîyayan akeno; rêzefîlm herundeya cewabanê haziran de temaşekerdoxan dawet keno ke bi xo pers bikerê û cewabanê xo bigêrê. Ardimkarê rejîsore û hedrekarê rêzefîlmî Erdal Tîmurî rêzefîlm û xebatanê xo yê zîrekîya viraşteye ser o qisey kerd.
Erdal Tîmurî dîyar kerd ke çend aşmî verê cû dest bi nê xebatan kerdo: “Wexto ke babeta zîrekîya viraşteye kewte rojeva dinya, ma zî qerarêk girewt, tîmêk awan kerd û dest bi xebatan kerd. Ma di embazî nê tîmî ser o vindertê. Verê ke dest bi xebatan bikerê, ma nêzdîyê des rojan perwerdeyê zîrekîya viraşteye girewt; badê perwerdeyî dest bi hedrekerdişê klîban kerd. Wexto ke sewîyeya înan berz bîye, qerar ame dayene ke rêzefîlmêk bêro viraştene. Netîce de 2 aşman de rêzefîlmê “Pirsên Azad” yê 13 beşan ame viraştene.”
‘Amancê projeyî no yo ke domanê Kurdîstanî ezber nêmusê, pers bikerê û bi persan bimusê’
Erdal Tîmurî dîyar kerd ke her beşê rêzefîlmî 8 deqîqeyan ra yeno meydan û babetî zanistî ser o ameyê awankerdene: “Rêzefîlmê ma de fîzîk, kîmya, bîyolojî ra heta etnografî, ekolojî û antropolojî babetanê cîya-cîyayan ser o ame vindertene û Azad her beş de hîrê persan keno. Amancê projeyî no yo ke domanê Kurdîstanî ezber nêmusê, pers bikerê û bi persan çîyan bimusê.”
‘Nika hedefê ma no yo ke zîrekîya viraşteye bi temamî entegreyê Tudî bikerê’
Erdal Tîmurî ard ziwan ke verê cû bi teknîkanê 2D û 3D rêzefîlmêko 8 deqîqeyî 6 aşman de qedênayêne la nika bi zîrekîya viraşteye karê înan hîna rehet bîyo: “Verê cû karê ma aşman girewtêne. Nika bi zîrekîya viraşteye eynî kar hewteyêk de beno. Projeyêk ke verê cû 2 serrî dewam kerdêne, nika bi ardimê zîrekîya viraşteye 2 aşman de qedîyeno. No hem hetê lezî ra hem zî hetê muhtewa ra ma rê hîna rind o. Nika hedefê ma no yo ke zîrekîya viraşteye bi temamî entegreyê Tudîya xo bikerê. Embazê ma nika na ser o xebitîyenê ke studyo, anîmasyon û dublaj pêro bi zîrekîya viraşteye bêrê hedrekerdene.”
