Sêrt – Sidik Yilmaz destpêkê partîya sîyasîye ya kurdan ra nat qezaya Berwarî de xebatê sîyasetê kurdan kerdêne. Sidik Yilmaz tewr peynî Hemserekê Rêxistina DEM Partî ya Berwarî bi û na dinya ra koç kerd. Lajê ey Îbrahîm Yilmazî vat: “Çunke kesêko rêxistinbîyaye bi, îşkence tesîr nêkerd ey ser o, ey rê bî hêz. Heta roja peyêne dewaya xo ra fek nêverda.”
Sidik Yilmaz yan zî Apê Sidik (78) ke mudetêkê dergî bi nêweşîyêka girane nêweşxane de tedawî bîyêne, 5ê teşrîna verêne de ganê xo ra bi. Ey 1990 ra, Partîya Kedê ya Şarî (HEP) ra heta DEM Partî, qezaya Berwarî ya Sêrtî de mîyanê xebatanê sîyasîyan de cayê xo girewt. Çiqas ke dewlete zaf reyî o destbend kerd û tepişt zî, têkoşînê sîyasetê demokratîkî ra fek nêverda.
‘Ma çar kesê keyeyî pîya hepisxane de bîyî’
Îbrahîm Yilmazî ard ziwan ke pîyê ey dem bi dem kewt hepisxane: “2017 û 2018 de ez, pîyê mi û yew birayê mi hepisxane de bîyî. Wextêk ma çar kesê keyeyî pîya hepisxane de bîyî. Wexto ke HADEP 1999 de qeza de bi fermî ame akerdene, mîyanê zehmetî û fehmê feodalîzm û eşîrtîye de ame akerdene. Pîyê mi nêzdîyê 30 serran o ke nêweşîya KOAH’î ra derd antêne, la reyna xebitîyêne û qet game peyser nêeşte.”
‘Xo vurnabî’
Îbrahîm Yilmazî vat ke pîyê ey verê ke rêxistinî bişinasno, kesêko zaf hişk bi la dima fehmê xo vurna: “Pîyê mi kesêko wêrek û jêhatî bi. Rojêk ma şîbî karê xo yê rençberîye, eskerî ameyî û uca pîyê mi zaf kuto. Nêverdayêne ma zî mudaxele bikerê. Çunke kesêko rêxistinbîyaye bi, ê kutişî tesîr nêkerd ey ser o, ey rê bî hêz. Heta roja peyêne dewaya xo ra fek nêverda. Emrê ey xebatanê rêxistinî ser o qedîya.”
