Şandeya Ciwanên Enternasyonalîst a ku ji 8 welatên Ewropayê hatibû ji bo serdana Rêberê Gelê Kurd Abdullah Ocalan li Îmraliyê serî li Wezareta Dadê da. Şandeyê diyar kir ku ji bo Pêvajoya Aştî û Civaka Demokratîk bi pêş ve biçe, azadiya Abdullah Ocalan pêwîst e.
Endamên Komîsyona Dîplomasiyê ya Meclisa Ciwanan a Partiya Wekhevî û Demokrasiyê ya Gelan (DEM Partî) û Şandeya Ciwanên Enternasyonalîst a ji 8 welatan hatibû, bi armanca hevdîtina bi Rêberê Gelê Kurd Abdullah Ocalan re serî li Wezareta Dadê dan. Şandeyê piştî serlêdanê li Navenda Giştî ya DEM Partiyê daxuyanî da û piştgiriya xwe ji bo Pêvajoya Aştî û Civaka Demokratîk anî ziman û bal kişand ser girîngiya azadiya Abdullah Ocalan.
Di şandeyê de nûnerên Contre-Attaque & Autonomie ji Swîsreyê, Sindacato Unione Democrazia Dignità Cobas ji Îtalyayê, ji Yewnanistanê Civata Malên Dagirkirî yên Prosfygika ya Kolana Aleksandras, ji Katalonyayê La Saó, ji Awûstûryayê Mala Zêrîn, ji Fransayê Jeunesse Internationaliste Française, Cumann Saol Saor ji Îrlandayê û ji Elmanyayê Yekîtiya Ciwanên Demokratîk (YUNA) cih girtin.
Li ser navê şandeyê metna daxuyaniyê ya bi Îngilîzî ji aliyê endama YUNA’yê Isabelle Marie Whittenberg, ya bi Tirkî jî ji aliyê endama Meclîsa Ciwanan a DEM Partiyê Jiyan Bahadir ve hat xwendin.
Isabelle Marie Whittenberg da zanîn ku ew ji bo piştgiriya Pêvajoya Aştî û Civaka Demokratîk ji welatên Ewropayê hatine û diyar kir ku Abdullah Ocalan beriya 27 salan rastî komployeke navneteweyî hatiye û ji wê dîrokê ve li Girava Îmraliyê tê ragirtin.
‘Em daxwaza azadiya Abdullah Ocalan dikin’
Isabelle Marie Whittenberg destnîşan kir ku ji bo pêvajoya aştiyê bidome ew daxwaza azadiya Abdullah Ocalan dikin û bal kişand ser pozîsyona siyasî ya Abdullah Ocalan. Isabelle Marie Whittenberg anî ziman ku ji bo serkeftina mayînde û pêşveçûna pêvajoya aştiyê azadiya wî pêwîst e.
Isabelle Marie Whittenber daxwaza azadiya Abdullah Ocalan kir.
