Hemsereka Meclîsê Şarî yê Şingalî Xoxê Dexîle komployê 9ê teşrîna verêne erjna û vat: “Rayber Apo ma rê rayîro raşt yê têkoşîn û xoyîbîyayîşî yo.”
9ê teşrîna verêne serrgêra 28. yê destpêkê komployê mîyanneteweyî yo ke vera Rayberê Şarê Kurdan Abdullah Ocalanî ame kerdiş. Ewro çar parçeyanê Kurdîstanî û teberê welatî de şar seba mojnayîşê nêrazîbîyayîşê xo waran de yo. Komplo 9ê teşrîna verêne 1998î de bi pêşengîya DYA, Îsraîl û Îngilîstanî dest pêkerd û amancê ey o bî ke Ocalanî meydan ra wedarnê. Proses heta 15ê sibata 1999î dewam kerd û bi esîrgirewtişê Ocalanî qedîya. Komelê êzîdîyan Rayber Apoyî sey xelaskarê xo vîneno û xelasîya xo azadîya ey de vîneno.
‘Bi peymana 9ê teşrîna verêne waşt ke şexsê Rayberîye de xoverdayîşê êzîdîyan bişiknê’
Xoxê Dexîle vat ke Rayber Apo 28 serran ra nat mîyanê çar dêsan de yo. La bi sayeyê têkoşînê bêemsal yê şarî û Rayberîye, komplo heta nika bi temamî ser nêkewto. Dexîle wina vat: “9ê teşrîna verêne de zaf hedîseyê bi derdî ameyî ma sere. 9ê teşrîna verêne 2019î de hêrişê vera Serêkanîye kerd; peymana 9ê teşrîna verêne ya mîyanê Bexda û Hewlêrî zî vera êzîdîyan ame îmzekerdiş. Bi peymana Şingalî waştêne ke şexsê Rayberîye de xoverdayîş û têkoşînê komelê êzîdîyan bişiknê, bêîrade û bêheq verdê. La bi sayeyê têkoşîn û xoverdayîşê cinî û ciwananê êzîdîyan cehdê înan ser nêkewtî.”
‘Rayber Apo komelê ma yê êzîdîyan rê rayîro raşt yê têkoşîn û xobîyayîşî yo’
Xoxê Dexîle îfade kerd ke komelê êzîdîyan Rayber Apoyî sey rayberê xo vîneno: “Sey komelê êzîdîyan ma Rayber Apoyî xo rê rayber vînenê. Senî ke estbîyayîş, nasname û êzîdîtîya ma xeta sûre ya, fikrê Rayberîye zî ma rê xetê sûrî yê. Coka heta ke azadîya fîzîkîye ya Rayberîye nêbêro ca, têkoşînê ma do dewam bikero.”
‘Bi sayeyê Rayberîye komelê êzîdîyan warê sîyasî, rêxistinî û leşkerî de xo paweno’
Xoxê Dexîle derheqê pawitişê destkewteyanê komelê êzîdîyan de wina vat: “Rayberîye vana ganî komelê êzîdîyan xo bi xo îdare bikero û xo bipawo. Çike 2014î de nê destkewteyî çin bîyî, komelê êzîdîyan qirkerdişan reyde rî bi rî mend. Ewro bi sayeyê Rayberîye komelê êzîdîyan warê sîyasî, rêxistinî û leşkerî de xo paweno.” Dexîle peynîya qiseykerdişê xo de bale ante muhîmîya koyanê Şingalî ser o: “Koyê ma hêlîna komelê ma yê êzîdîyan ê. Vera heme fermanan komelê êzîdîyan koyan de xo pawito, xoverdayîş mojnayo û heta ewro estbîyayîşê xo wina dewam kerdo. Ma nêverdanê ke tu kes û hêz dest bierzo hêlîna komelê êzîdîyan. Seba komelê êzîdîyan Koyê Şingalî xeta sûre ya.”
