Anqara – Hemserekê KNKî Ahmet Karamusî ard ziwan ke seba nasbîyayîşê statuyê şarê Kurdî yew dosya teslîmê Sekreterê Pêroyî yê Neteweyanê Yewbîyayan (NY) kerda. Ahmet Karamusî da zanayene ke seba yewîya neteweyîye her wextî ra vêşêr derfetî vejîyayê werte û wina va: “Hêvîyêka ma ya pîle esta ke ma do demê ameyoxî de bieşkê yew mizgînîye bidê şarê xo.”
Kongreya Neteweyî ya Kurdîstanî (KNK) kombîyayîşê xo yo pêroyî yê 24ine de ke 6-7ê Hezîrane de viraştbî, qerar girewt ke seba ke şarê Kurdî bi statuyê çimdarîye Neteweyanê Yewbîyayan (NY) de ca bigêro, wa yew mektuba fermîye bêro şawitene seba Sekreterîya Pêroyî ya NYyî û dest bi kampanyayêke kerd. KNK çar parçeyanê Kurdîstanî de dest bi xebatê arêdayîşê îmzayan kerd û na xebate dewam kena. Îmzayê ke bêrê arêdayene do bişawîyê NYyî rê û statuyê çimdarîye do bêro waştene. Hetê bînî ra zî seba yew Kongreya Neteweyîye xebatê KNKî dewam kenê. Rayberê Şarê Kurdî Abdullah Ocalanî zî peyamanê xo yê peyênan de bale ante yewîya neteweyîye ser û ard ziwan ke yewîya neteweyîye îhtîyacîyêka tarîxî ya.
Hemserekê KNKî Ahmet Karamusî derheqê kampanyaya seba statuyê çimdarîye yê NYyî û xebatanê yewîya neteweyîye de Ajansa Welatî rê qisey kerd.
‘Ma seba statuyê şarê Kurdî muracat kerd’
Ahmet Karamusî dîyar kerd ke qerarê kombîyayîşê KNKî yê seba statuyê çimdarîye yê NYyî ser o xebatê înan dewam kenê û wina va: “No babete serre û nêm o rojdemê ma de bi. Dima ke amadekarîyêka derge ameye kerdene û pisporan reyde pêvînayîşî virazîyayî, ma kombîyayîşê pêroyî yê 6-7ê Hezîrane de sey teklîfî pêşkêş kerd. Kombîyayîşê pêroyî de bi giranî ma naye ser o qisey kerd. Na bingeh ser o ma dest bi xebatanê na projeye kerd. Êdî no teklîfê seba Neteweyanê Yewbîyayan serê nameyê heme Kurdan o. Ma muracato fermî şawit Sekreterê Pêroyî yê Neteweyanê Yewbîyayan rê. Fersendê ma zî virazîya ke ma Sekreterê Pêroyî reyde zî ronişê. Ma dosya bi awayêko fermî dest bi dest teslîm kerde. Seba ke heme Kurdî paştî bidê na projeye, dezgeh, partî û rêxistinanê Kurdan reyde zî pêvînayîşê ma bîyî. Yew heyeta ma Başûrê Kurdîstanî de pêro hetan reyde pêvînayîşî kerdî. Pêvînayîşê ma yê Başûrê Kurdîstanî de do dewam bikerê.”
‘Konferans de ma qerarê awankerdişê komîteyêke girewt’
Ahmet Karamusî bale ante konferanso ke 3yê Teşrîna Verêne de Bruksel de ame viraştene ser û wina qisey kerd: “Bi yew Hûmaro hîra, çar parçeyanê Kurdîstanî ra partîyî, dezgehî û şexsîyetî tewrê konferansî bîyî. Pisporê mîyanneteweyî yê huqûq û dîplomasî zî tewr bîyî. Konferansî yew roje dewam kerd. Projeya ke Kurdî bi statuyê çimdarîye NY de ca bigêrê, konferans de zî bi yew coşo pîl ameye qebûlkerdene. Konferans de reyna tayê qerarî ameyî girewtene. Seba kar û xebatanê na projeye, qerarê awankerdişê yew komîteya hempar ke mîyanê aye de pisporî zî estê, ame girewtene. Na komîteya ke bêro dîyarkerdene do karê dîplomasîye û her warî bîyaro ca. Binê banê na komîteye de komîteyê cîya-cîyayî do bêrê amadekerdene. Kampanyaya îmzayan zî yew leteyê na xebate ya. Armanc o yo ke bi na kampanya çar parçeyanê Kurdîstanî de û her cayê ke Kurdî tede estê, 10-15 mîlyon îmzayî bêrê arêdayene. Komîte do çar parçeyanê Kurdîstanî ra bo û bi awayêko hîra temsîlîyeta Kurd û Kurdîstanî na komîteye de bêro kerdene. Pêvînayîş û xebatê ma zî bêguman do dewam bikerê.”
‘Her wextî ra vêşêr îhtîyacîya şarê Kurdî bi yewrêzîye esta’
Ahmet Karamusî xebatanê yewîya neteweyîye ser o zî da zanayene ke şert û mercê dinya Kurdan mecbûrê yewîye kenê û qiseykerdişê xo wina dewam kerd: “Her wextî ra vêşêr hewceyîya şarê Kurdî bi yewrêzîye esta. Ganî partîyê Kurdan babetanê hemparan ser o pîya bêrê û yewrêzîya xo awan bikerê. Ma bi hêvî yê ke na gama konferansê 3yê Teşrîna Verêne bibo wesîleya zemînê yew konferansê yewîya neteweyîye. Têkilî û dîyalogê ma do dewam bikerê. Nê 10-15 serranê peyênan de tewr zaf nê wextî de rewşa yewîya neteweyîye munasîb a. Îhtîmalêko zaf pîl ma do bieşkê nê prosesî de yewrêzîya xo virazê. Ganî heme Kurdî, dezgehî, partîyî û hêzê Kurdan goreyê yewrêzîye têbigêrê. No wezîfeyêko neteweyî yo. Ganî heme hetî fedakarîye bikerê û babetanê hemparan de pîya hereket bikerê. Bi nê awayî yewrêzîya Kurdan eşkena bêro ca û destkewteyê ke estê eşkenê bêrê pawitene.”
‘Vernîya yewîya neteweyîye de astengêka pîle çin a’
Ahmet Karamusî dîyar kerd ke vernîya yewîya neteweyîye de astengîyêka pîle çin a û wina dewam kerd: “Qet yew partî û rêxistin seba yewîye astengîyanê girdan nêvejeno. Pêvînayîş û têkilîyanê ma de pêro hetî ferqê ney de yê ke heger yewîya neteweyîye nêbo tehdît û tehlukeyî do pîlêr bibê. Seba aye zî serran ra yo ke menfeetanê sîyasîyan û têkilîyanê bi dewletanê herême reyde vernîya yewîye de astengî vetêne. La qonaxa ke ma tede yê, sey prosesoke Bakur û Rojava de dest pêkerdo, rewşa Rojhelat û Başûrê Kurdîstanî zî yewrêzîya ma ferz kena. Ganî pêro partî, dezgeh û rêxistinî bi na mesuldarîye têbigêrê. Problemî bêguman estê. La dîyalog ameyo destpêkerdene û her wextî ra vêşêr dîyalog zêde bîyo. Başûrê Kurdîstanî eşkeno meseleya yewîye de ardimêko pîl bikero. Awankerdişê parlamentoyî yew babeto sereke yo. Yewkerdişê pêşmergeyan zaf girîng bi. Ma zî do ardim bikerê ke parlamento bêro awankerdene. Yew problemê vernîya yewîye zî no yo. Ganî heme hetî seba awankerdişê parlamentoyî ardim bikerê. Ganî pêro partî û rêxistinê Kurdan bi mesulîyet hereket bikerê. Heger ma bi na mesuldarîye tênegêrê ma pêro do zerar bivînê.”
‘Belka ma yew konferansê yewîye organîze bikerê’
Ahmet Karamusî dîyar kerd ke ê seba konferansêka yewîya neteweyîye amadekarîye kenê û peynîye de wina va: “Konferans heger bi tewrbîyayîşê pêro hetan virazîyo, muhtemel o ke stratejîyêka hempare bi yew peymane bêro ca. La ma nêwazenê mizgînîyêka ke zemînê aye çin o bidê şarî û tarîx û wextê konferansî safî bikerê. La sey KNKî ma eşkenê vajê ke hêvîyêka ma ya pîle esta û ma hêvîdar ê ke dîyalogê ke estê do netîce bigêrê. Hêvîyêka ma ya qewetîne esta ke ma do demê ameyoxî de bieşkê mizgînîyêke bidê şarê xo. Peyamê birêz Ocalanî yê seba yewîye zaf girîng ê. Birêz Ocalanî na çarçewa de –ke raya pêroyî de zî ame parekerdene– birêz Mesut Barzanî, birêz Bafil Talabanî û pêro hetan rê peyamê yewîye da. Birêz Ocalan babeta yewîye de yew nuqteya girînge ser o vindeno. Ganî heme hetê Kurdan mîyanê xo de yewrêzîya xo virazê û rêz bimusnê yewbînî. Vengdayîşê birêz Ocalanî sey mesuldarîye û wezîfeyê xo vînenê. Ma zî sey KNKî venga heme hetan danê; qet yew perçeyê Kurdan bi tena serê xo nêeşkeno estbîyayîşê xo bipawo. Bi yewîya neteweyîye ma do bieşkê destkewteyan bipawê û warê mîyanneteweyî de zî vengê xo qewetîner bikerê. Fersendî û tehlukeyî hende yewbînî yê.”
