Alîreza Sepahî ke Îran de seba beşdarbîyayîşê çalakîyanê çeleyî ameybî tepiştene û derheqê ey de çar rey cezaya îdamî ameybî dayene, ame îdamkerdene.
Avûkata Alîreza Sepahî Şehrzad Şehbazîye hesabê xo yê medyaya sosyale ra eşkerayîyêk daye û dîyar kerd ke îdamê mûwekîlê aye ame tatbîqkerdene: “Ez ey xo vîr ra nêkena.”
Sepahî 4ê teşrîna verêne de, roja yewşemeyî yanî verê îdamî, Hepisxaneyê Dastegardî de reya peyêne maya xo reyde pêvînayîş kerdbî. Maya ey Somaya Afşar zî sey ey tepişte ya.
Seba protestoyanê serneweyî welat de tepiştiş û îdamî zêde benê.
Goreyê rêxistinanê komelê sîvîlî yê sey Heqê Merdiman ê Îranî û Yewîya Vera Cezaya Îdamî, serra 2025î de Îranî tewr kêmî hezar û 639 kesî îdam kerdî. Ame vatene ke no bîlanço serra 1989î ra nata hûmara tewr berz a.
Goreyê Rêxistina Efûyî ya Mîyanneteweyî, Îran dimayê Çînî welato dîyin o ke tede tewr zaf îdamî benê.
