Di wayî, Seda Acar (Amara Zîlan Ararat) û Kubra Acar (Amara Zîlan), yewbînan dima seba azadî û pawitişê estbîyayîşê şarê kurdan rîyê xo çarna koyanê Kurdîstanî. Dayîk û pîyê înan wazenê cenaze û goranê kênayanê xo bivînê û hetkarî wazenê.
Kubra Acar û Seda Acar serranê 2014-2015î de beşdarê rêzanê Têkoşînê Azadîya Kurdîstanî bîyî. Kubra Acar 5ê teşrîna verêne ya 2016î de qezaya Çele ya Colemêrgî de pêkewtişêk de şehîd bîye. Seda Acar ke nameyê aye yo verên Ezda Ararat bî, badê şehadetê waya xo nameyê aye girewt û têkoşînê xo dewam kerd. Demêko kilm dima Seda Acar zî herêma Barzanî ya Başûrê Kurdîstanî de hêrişanê hewayîyan de şehîd bîye. Keye bi serran o cenaze û goranê înan gêreno, la cayê înan hema nêyeno zanayene.
Maya înan Îpeke Acare vat ke aye 5 kênayî û 2 lajî bi feqîrî pîl kerdî: “Mi qet bawer nêkerdêne ke Seda do beşdar bibo; zaf hetkarîya keyeyî kerdêne. Merdimêka jêhate bîye, merdiman ra hes kerdêne.” Îpek Acare dîyar kerd ke her di wayan zaf yewbînan ra hes kerdêne: “Verê ma xebera şehadetê Amara Zîlane girewte. Serrêk dima mi televîzyon de şehadetê Seda dî û fehm kerd ke aye nameyê waya xo girewto.”
Pîyê înan Seyîtxan Acarî vat ke o bi kênayanê xo serberz o û waştişê înan dîyayîşê koyanê Kurdîstanî û Rayberîye bî: “Wexto ke Ezda beşdar bîye, mamostayê xo yê mektebî rê notêk verda û vat ‘Eke ez binê beyraqa Tirkîya de biciwîya, ez do binê beyraqa Kurdîstanî de şehîd biba.'”
Seyîtxan Acarî vat ke cenazeyê her di kênayanê ey zî nêdîyar ê. Dayîke seba cenazeya Amara Zîlane muracatê walîtî û dozgerîya Colemêrgî kerd, la tu agahî nêdîyaya.
Seyîtxan Acarî vat ke înan testê DNA dayo û venga dezgehan da: “Cenazeyê ma kotî de bê, Başûr yan Vakur, kamcîn goristan de bê, ma wazenê înan bivînê. Hetkarîya ma bikerê ke goranê kênayanê mi bêrê dîyarkerdene; wa adirê zerrîya ma misqalêk zî bibo kêmî bibo.”
