Remzîye Canbey behsê cuye, tepşê vera tedayan û rayîrê beşdarbîyayîşê kênaya xo Gulîstane Canbey (Aso Dîren Têkoşîn) kerd û vat: “Şewa veyveyî qedîyaye û herkes vila bî; ma dî ke Aso vindî bîya. Ma gêrayî, la ma a nêdîye. Mi zanayêne ke aye rayîro ke ey ra bawer kerdêne, weçînayo.”
Aso Dîren Têkoşîn serra 1994î de qezaya Tetwana Bedlîsî de keyeyêkê welatperwerî de ameye dinya. Aye domanîya xo ra nata polîtîkayê înkar, îmha û asîmîlasyonî yê dewlete dîyî û qebul nêkerdî. 18 serrî de, şewa nîşanê xo de beşdarê Têgêrayîşê Azadîya Kurdîstanî bîye.
Maya aye Remzîye Canbey vat ke fikrê kênaya aye emrê aye ra pîlêr bî: “Aso hertim embazanê xo arê kerdêne û rayberîya înan kerdêne. Waştêne mi reyde şêro mîtîng û bernameyan. Kitabî zaf wendêne; xoza ra zaf hes kerdêne, deşt û koyanê welatê xo ra gêrayêne û resmê înan girewtêne.”
Remzîye Canbey dîyar kerd ke badê ke birayê aye Dîren beşdar bî û dewijê înan Karvan şehîd bî, pîyê aye waşt ke aye bizewicno ke beşdarê Partî nêbo. Aso datîzayê xo reyde nîşankerda bîye. Remzîye Canbey wina vat: “Şewa heneyî şîye Tetwan û xo rê kincê veyveyî yê kewe, sûr û zerd herînayî. Vat ‘Ez kincê sipî nêdana xo ra, ez do bi rengê xo bimana.’ Dewijî pêro şaş mendî.”
Remzîye Canbey vat ke badê beşdarbîyayîşê Aso, tedayê dewlete keyeyî ser o zêde bîyî: “Polîsan vatêne ‘Şo aye bîyare, ma do heme xercê to bidê.’ Mi vat ‘A domana min a; şewa heneyê xo de na cuye qebul nêkerde û rayîrê xo weçîna. Ez aye dima nêşina, sereyê mi bi kênaya mi berz o.'”
Aso Dîren Têkoşîn 3 serrî Rojawan de, dima zî Başûr de mende û maya xo ra vatêne “Ez qet poşman nîya”. Aso 19ê êlula 2022î de, Gever de, dewa Darê de, hevala xo Evîne Rêber Andok reyde pêkewtişêk de şehîd bîye. Remzîye Canbey vat ke polîsan nêverda cenaza yae camî de bêro şutene: “Ma cenaze ard keye û mi kênayanê xo reyde şute. Mi xo rê qewet da ke ez vera dişmen û xayînan nêbermena û înan şa nêkena.”
Aso Dîren Têkoşîn rojnuşteyê xo de wina nuştbî: “Sey domanêko ke newe dest bi şîyayîşî keno, mi zî dest bi rayîrê şorişî kerd. Silam seba domananê welatê mi ke çimê înan mirdîya xo roşn ê. Ma hewnê xo bi herre xemilnayî. Dişmenî ma pê guleyanê ke bedenanê ma ra girdêr bîyî, kiştî.”
