Nuştoxê Kovara Ozgur Halk Şîyar Amedî hûmara 9. ya kovare de nuşteyê xo yê bi sernameyê “Bi Ruhê Awankerdişê Komelkî ver bi Pratîkê Azadîye” de vat ke têkoşîn tena bi îdeolojîye nêbeno; ganî no îdeolojî cuya rojane de bibo awankerdişê komelêko newe.
Şîyar Amedî nuşteyê xo de çarçewaya Prosesê Aştîye û Komelê Demokratîkî de wezîfeyê awankerdişê komelkî erjna. Amedî vat ke vera her qeyde hêriş û xetereyî, rayîro tekane yê cewabdayîşî berzkerdişê ruhê awankerdişî û zindîkerdişê pratîkê azadî yo.
Amedî vat ke awankerdişê komelkî tena karêko rêxistinî nîyo: “Awankerdişê komelkî cewabo tewr gird o ke vera fehmê qirkerdişî yeno dayene. Amancê sîstemê serdestî şiknayîşê îradeyê komelî yo; la wexto ke komel bi aqil û îradeyê xo yê azadî rêxistina xo awan keno, heme planê îqtîdarî veng vejîyenê.”
Amedî dîyar kerd ke zanayîşo teorîk heta ke nêbo pratîk, nêşeno komelî bivurno: “Cuya newîye kede, qerardarî û ruhêko berz ê fedayî wazena. Ganî perwerde, ekonomî, kooperatîfan û heme dezgehanê komelkî de ruhê neteweyê demokratîkî bêro vernî.”
Amedî vat ke hêzo ke do modelo xoser û demokratîk lingan ser o verdo, îradeyê rêxistinbîyaye yê komelî yo: “Wexto ke ciwan û heme beşê komelî bi ruhê awankerdişî beşdarê xebatan bibê, tu hêz nêşêno vernîya na gama azadîye bigîro.”
Amedî vat ke serkewtiş bi xorînbîyayîşê îdeolojîk û qerardarîya pratîkî mumkun o: “Seba ke ma destkewteyan bipawê û komelêko azad awan bikerê, ganî ma bi qerardarî bixebitîyê. Awankerdişê cuya demokratîke hewnêk nîyo; netîceya têkoşîn û pratîkê ma yê rojaneyî yo.”
Amedî peynîya nuşteyê xo de vengdayîşê beşdarîya xurte kerd: “Ruhê serdemî ma ra wazeno ke ma fikrê azadîye her taxe, dew û bajarî de bikerê cuye. Yewbîyayîşê îdeolojî û pratîkî do ameyoxê ma garantî bikero.”
