Îstanbul – Di birayî; Mehmet Korkmaz (Bahoz) û M. Şerîf Korkmaz (Kemal) vera teda û zordarîye verê xo danê têkoşînê azadîya Kurdîstanî û na raye de şehîd benê. Kadrîye Korkmaze, têkoşîn û vîrardişê her di lajanê xo bi çimêko pîroz zereyê xo de pawena. Kadrîye Korkmaze bale ante zordarîye ser o û wina va: “Dewlete neheqî lajanê mi kerd, loma lajê mi tewrê partîye bîyî.”
Keyeyê Korkmazî qezaya Kerboranê ya Mardînî ra yo. 6 laj û keynêka nê keyeyî est ê. Dewe de cuyayîşêko weş cuyenê. Keyeyî dewe de karê citekarîye û heywandarîye kerdêne. Wexto ke serrname ver bi serranê 90î şona, teda û zordarîya eskeran dewe ser o zêde bena. Seba ke dewijî kurd ê û dewaya azadîya Kurdîstanî nas kenê. Gedeyanê keyeyî ra Mehmet Korkmaz zewicîyayeyo û cinîya ey diganîya ya. Eskerî xeylî rey erzenê dewe ser û Korkmazî destbend kenê. Vera tada û zordarîye, hêrs mîyanê gedeyanê keyeyê Korkmazî de zêde beno. Mehmet Korkmaz wazeno tewrê Têgêrayîşê Azadîye bibo. La birayê ey o ey ra qijêrî Mehmet Şerîf Korkmaz verê ey serra 1991î de tewrê Têgêrayîşê Azadîye beno. Badê tewrbîyayîşê Şerîf Korkmaz (Kemal), tada eskeran keyeyî ser o hîna zêde beno. Mehmet Korkmaz xeylî rey yeno girewtene û îşkenceyan vîneno, keweno hepisxane.
Teda û zordarî keyeyî mecbûrê koçberîye kenê
Mehmet Korkmazî badê ke hepîsxaneyî ra vejîyeno, seba ke xeyalê xo yê nêmcetî ca bîyaro, serra 1993î de verê xo dano mîyanê refanê têkoşînê azadîye û qodê Bahozî gêno. Her di birayî badê 2 serran koyan ra raştê yewbînan yenê, la no pêvînayîş înan ê koyan de zaf derg nêrameno. Mehmet Korkmaz (Bahoz) 3yê teşrîna verêna 1993î de qezaya Kercewsê ya Êlihî de şehîd keweno. Pey ey biraya ey o qij Mehmet Şerîf Korkmaz (Kemal) zî serra 1994î de Koyê Reşkî yê herêma Botanî de şehîd keweno.
Tada û zordarîya dewlete ya keyeyê Korkmazî ser o her wext dewam kerdo, keye vera tada û zordarîye mecbûr maneno ke koçî merkezê Kerboranê û uca ra zî koçî Îstanbulî bibo. La tada û zordarîya dewlete Îstanbulî de zî keyeyî ser o dewam kenê. Gedeyanê keyeyî ra Mustafa Korkmaz zî xeylî rey yeno girewtene û îşkence ey ra yeno kerdiş. Mustafa Korkmaz zî mecbûr meno ke vejîyo teberê welatî.
Kadrîye Korkmaze bi serran o ke nê dej û zordarîya dewlete reyde cuyena. Badê şehadetê gedeyanê xo, ge-ge çîyan xo vîr ra kena. Ge-ge nameyê gede û tornanê xo xo vîr kena. La tu wext gedeyanê xo, têkoşîn û sebebê tewrbîyayîşa gedeyanê xo ya mîyanê refanê têkoşînê azadîye xo vîrra nêkena. Tewlê hende zilm û zordarîya dewlete zî Kadrîye Korkmaze, her çiqas ge-ge vîrardiş û cuyayîşanê keyeyê xo xo vîr ra bikero zî, la têkoşînê gedeyanê xo xo vîr ra nêkerda û her game gedeyanê xo zerreyê xo de pawita. Seba Kadrîye Korkmaze têkoşîn û vîrardena her di lajanê aye pîrozîya tewr qiymetin a.
Kadrîye Korkmaze ajansa ma rê qalê gedeyanê xo kerd.
‘Mehmedî waşt tewrê partîye bibo la Şerîf verê ey şî’
Kadrîye Korkmaze dîyar kerd ke 6 laj û keynêka aye est ê û wina qisey kerd: “Ma Kerboranê de dewe de cuyêne. Cuyayîşê ma dewe de zaf weş bî, her çîyê ma estbî. Dewe de zad û erdê ma estbî. Ma bi bax û baxçeyan û heywandarîye debara xo kerdêne. Cuyayîşêko weş bi. Lajê mi Mehmet zewicîyayebî, cinîya ey diganî bîye, Mehmet va; ez do tewrê partîye bibî, la biraya ey Mehmet Şerîf, ey ra qij o nêverda û biraya xo rê va ‘ti zewicîyayeyê, do gedeyê se bikerê, coka ez do tewrê bibî’. Mehmet Şerîf wina tewrê partîy bî. Senî ke Mehmet Şerîf tewrê partîye bî, dewlete tadayê xo ma ser o zêde kerd. Xeylî rey eştêni keyeyê ma ser, Mehmet xeylî rey ame girewtene û hepîsxaneyî de îşkence ey ra ame kerdiş. Badê ke hepîsxaneyî ra vejîya, o zî tewrê têkoşînî azadîya Kurdîstanî bî. Mi Mehmetî rê va ti zewicîyayeyê tewr mebe, la o zî tewr bî. Badê tewrbîyayîşê her di gedeyanê mi, dewlete zilmê xo zêde kerd û ma tehdît kerdêne.”
‘Semedê dejî ra endî hişê mi şono’
Kadrîye Korkmaze dîyar kerd ke vera tadayê dewlete înan koçî Îstanbulî kerdo û wina va: “Lajê mi Mustafa zî xeylî rey ame girewtene û dima mecbûr mend ke o zî koçî welatanê bînan bikero. Mustafa badê ke hepîsxaneyî ra vejîya zî, dewlete fek ey ra veranêda. Xora hepîsxaneyî de îşkence ey kerdibi. Mustafa vera zilmê dewlete koçber bî. Dewlete niheqî lajanê mi kerd, coka lajê mi tewrê partîye bîyî. Her roje eskerî dorûverê keyeyê ma de bîyî. Keyeyê ma veşna, tu çî ma rê nêverdayî. Ma dewe ra koçî Kerboranê kerd, uca ra zî koçî Îstanbulî kerd. Mi xeylî dejî antê coka ez her çî xo vîr ra kena, endî hişê mi şono.”
